لوڪ ادب، لساني ۽ ادبي تحقيق

ڊاڪٽر پروين: جاکوڙي محققہ

ڊاڪٽر پروين موسيٰ ميمڻ ھڪ مڃيل محققہ آھي، سندس مقالا ۽ تحقيقي مضمون مختلف مخزنن ۾ ڇپبا رھن ٿا. ھن ڪتاب ۾ ھائر ايجوڪيشن ڪميشن (HEC) جي منظور شدہ جرنلز ۾ 2009ع کان 2023ع تائين ڇپيل ريسرچ پيپرز ۽ چند اهي مقالا پڻ شامل ڪيا ويا آهن جي ”ٽہ ماهي مھراڻ، ”ادبي تحقيق“ ۽ ٻين رسالن ۾ شايع ٿيا. ٻہ ٻيا اڻ ڇپيل آهن سي پڻ شامل آھن.

4.5/5.0
63
0
آخري ڀيرو اپڊيٽ ٿيو:
ڇاپو 1

Title Cover of book DR Parveen Jakhori Muhaqeqa

حق ۽ واسطا

ڊاڪٽر پروين: جاکوڙي محققہ

(مقالا)

(هيڪ جي منظور شدہ جرنلز ۾ڇپيل ريسرچ پيپرز
2009ع کان 2023ع تائين)

ترتيب

ڊاڪٽر ياسر رضا

ڊجيٽل ايڊيشن: سنڌ سلامت ڪتاب گهر
books.sindhsalamat.com
2025ع

هتان کڻي هُت، جن رکيو سي رسيون،
ساجن سونھن سرت، وکان ئي ويجهو گهڻو.
شاھہ عبداللطيف ڀٽائي

انتساب

محمد عفان ياسر جي نانءُ

سنڌسلامت پاران

سنڌ سلامت ڪتاب گهر پاران ڊاڪٽر پروين موسيٰ ميمڻ جي مقالن تي مشتمل ڪتاب ”ڊاڪٽر پروين: جاکوڙي محققہ (مقالا)“ اوھان اڳيان آڻي رھيا آھيون، جنھن جو مرتب ڊاڪٽر ياسر رضا آھي.
ڊاڪٽر پروين موسيٰ ميمڻ ھڪ مڃيل محققہ آھي، سندس مقالا ۽ تحقيقي مضمون مختلف مخزنن ۾ ڇپبا رھن ٿا. ھن ڪتاب ۾ ھائر ايجوڪيشن ڪميشن (HEC) جي منظور شدہ جرنلز ۾2009ع کان 2023ع تائين ڇپيل ريسرچ پيپرز ۽ چند اهي مقالا پڻ شامل ڪيا ويا آهن جي ”ٽہ ماهي مھراڻ، ”ادبي تحقيق“ ۽ ٻين رسالن ۾ شايع ٿيا. ٻہ ٻيا اڻ ڇپيل آهن سي پڻ شامل آھن.
ھي ڪتاب ڪنھن بہ اداري ناھي ڇپايو پر سنڌ سلامت ڪتاب گهر جي ويب سائيٽ تي آنلائين اپلوڊ ڪري رھيا آھيون.. ٿورائتا آھيون ڊاڪٽر پروين موسيٰ ميمڻ جا جنھن ھي ڪتاب سنڌ سلامت ڪتاب گهر ۾ اپلوڊ ڪرڻ جي اجازت ڏني.

محمد سليمان وساڻ
مينيجنگ ايڊيٽر (اعزازي)
سنڌ سلامت ڊاٽ ڪام

sulemanwassan@gmail.com
sindhsalamat.com
books.sindhsalamat

منھنجي امڙ

صبر ۽ تسليم ۾ رضا تي راضي رهڻ جي قوت رکندڙ منھنجي پياري اميءَ لاءِ آئون ڇا لکان. بس پيار ۽ احترام ۾ فقط اهو چوندس تہ سڄي حياتي گهر ڀاتين، سنڌ ۽ سنڌي ٻولي ۽ ادب کي ارپڻ واري منھنجي امڙ هميشہ اسان کي همٿ، بردباري حوصلي سان گڏ هر دور ۾ پڻ صبر جو سبق ڏنو آهي. زندگيءَ ۾ جڏهن ڪڏهن پنھنجي لاءِ ڪي مسئلا پيش آيا تہ امڙ علم ۽ عبادت جي سمجهاڻي ڏني، شاھہ لطيف جو هيٺيون بيت جڏهن بہ ٻڌائيندي آهي تڏهن آئون ساڻس متفق ٿي ٿيندو آهيان ۽ اهو بيت مون کي ڌڻيءَ در يقين جو حوصلو ڏيندو آهي.

پَرَ ۾ پڇيائون عشق جي اسباب کي
دارون هن درد جو ڏاڍو ڏسيائون،
آخر ”والعصر“ جو آهيم اُتائون
تھان پوءِ آئون سِڪان ٿي سلام کي.

يا ڪڏهن چوندي.
ماندي ٿي نہ مارئي ﷲ اوڏو آهي،
سئو ورهين جا ڏکڙا لحظي ۾ لاهي.

مطلب تہ لطيف سرڪار جي شاعريءَ سان کين عشق آهي، جي اسان اولاد کي بہ ڪي بيت کانئن ٻڌي راحت ايندي آهي پر تحقيق آئون سنڌي ادب سان ايترو سلھاڙيل ڪونہ آهيان ۽ نہ ئي ڪڏهن پنھنجي پڙهائيءَ وچان ڪا فراغت ڪڍي سگهيس جو امڙ جا ڪتاب مڪمل پڙهان منجهائن پِرايان.
بي ڊي ايس ڪرن کانپوءِ ايف سي پي ايس مڪمل ڪيم ۽ پوءِ ڪئناڊا ۾ وڃي مستقل رهڻ ٿيو هاڻي ڊينٽل سرجريءَ جي انٽرنيشنل امتحانن جي تياريءَ تہ ايترو مشغول رکيو آهي جو ڪو وقت ئي نٿو ملي.
امڙ اڪثر اسان ٻارن کي چوندي آهي تہ پنھنجي فيلڊ ۾ ريسرچ، پيپرز لکو ۽ شايع ڪرايو، انھيءَ سان توهان جي پنھنجي فيلڊ ۾ بھتري ٿيندي جو هيءُ ريسرچ جو دور آهي. پھرين تہ آئون سندن ڳالھہ کي گهٽ توجھہ ڏيندو هئس پر هاڻي جڏهن منھنجا ٻہ ريسرچ پيپر انٽرنيشنل جرنلز ۾ شايع ٿي چڪا آهن، تڏهن کان مون کي سندن ڳالھہ جي ورٿ جو وڌيڪ اندازو ٿيو آهي.
هڪ ڏينھن سندن سي وي ڏسي حيران ٿي ويس مار! اميءَ جا تہ هيڏا سارا ريسرچ پيپرز شايع ٿيا آهن!!
کين چيم، ”امي انھن کي سھيڙي ڇو نہ شايع ڪرائجي“ مُرڪي چيائين ”تون ڪمپائيل ڪر“.
مون کي ڳالھہ دِل سان لڳي سو کانئن اهي هيڪ جا جرنلز کڻي انھن مقالن کي ترتيب ڏنم تہ چڱو خاصو ڪتاب تيار ٿي ويو. خوشي ٿيم تہ، ”واه! وڏو ڪم ڪري ويس“ ڇو تہ امي تہ اڄڪلھہ سفرنامو لکڻ ۾ هئي کيس وقت بلڪل ڪونہ، هو ڏسي سرهي ٿي.
اميد تہ سندن شاگردن، شاگردياڻين، استادن ۽ ٻين پڙهندڙن ۾ منھنجو هيءُ ترتيب ڏنل ڪتاب پسندو ايندو.

اميءَ جي پيرن جي هٿ،

ڊاڪٽر ياسر رضا
ائڊمنٽن، ڪئناڊا

ڪتاب بابت

منھنجي تحقيقي مضمونن ۽ مقالن کي سھيڙي منھنجي پٽ ڊاڪٽر ياسر رضا وڏو اهم ڪم ڪيو آهي. مون انھيءَ ڪتاب بابت سوچيو هو پر عملي جامو پھرائڻ لاءِ وقت بہ ڪونہ هئم تہ ڪي جرنلز پڻ ڏسڻ ۾ ڪونہ ٿي آيم ان کانسواءِ اڄڪلھہ هڪ سفرنامو ۽ چار ڪتاب ٻالڪ ادب جا هٿ ۾ اٿم، هيءَ مقالن جي ترتيب جا ياسر منھنجي ئي نظرداريءَ ۾ ڪئي آهي. 2009ع کان 2023ع تائين جي هيڪ جي ڇپيل مقالن تي مشتمل آهي پر آخر ۾ چند اهي مقالا پڻ شامل ڪيا آهن جي ” ٽه ماهي مھراڻ، ”ادبي تحقيق“ ۽ ٻين رسالن ۾ شايع ٿيا. ٻہ ٻيا اڻ ڇپيل آهن جي پڻ ڇپائيءَ لاءِ موڪليل آهن.
هن ڪتاب کي ترتيب ڏيڻ ۾ ڊاڪٽر ياسر جو دِلي شوق شامل آهي، آئون سمجهان ٿي تہ انھيءَ سان ريسرچ ڪندڙن کي پڻ وڏو لاڀ حاصل ٿيندو. ريسرچ پيپر لکڻ معمولي ڳالھہ نہ آهي هر پيپر ۾ ڪافي وقت لڳندو آهي، درست حوالا، مواد گڏ ڪرڻ، لکڻ، ڪمپوزنگ وڏو ڪم آهي، وڏن ماهرن جي تور تڪ، گهربل واڌارن ۽ سڌارن کانپوءِ اهي هيڪ جي منظور شدہ جرنلز ۾ شايع ٿين ٿا. لکندڙ جي علميت، قابليت ۽ صلاحيت سان معياري مقالو تيار ٿي ايڊيٽوريل بورڊ ۽ ماهرن جي ڪميٽيءَ جي اپرووَل کانپوءِ شايع ڪيو وڃي ٿو. منھنجو پھريون مقالو رَدِ ٿيو هو. پوءِ گهڻيءَ محنت ۽ توجھہ کانپوءِ هن ڪم ۾ ڪافي عبور ٿيو. پي ايڇ ڊي مڪمل ٿيڻ کانپوءِ اڄ الحمد ﷲ آئون پاڻ پڻ ”سنڌي ٻولي ريسرچ جرنل“ سنڌي لئنگئيج اٿارٽي ۽ ”ڪارونجهر ريسرچ جرنل“ سنڌي شعبو وفاقي اردو يونيورسٽيءَ جي ماهرن جي ڪميٽيءَ ۾ شامل آهيان. هيءُ سفر جاري ۽ ساري آهي ٻيا پڻ ڪجهہ تحقيقي مقالا لکيا اٿم جي پڻ انشاء ﷲ شايع ٿيندا. فاالوقت هي موجود مقالا توهان جي خدمت ۾ پيش ٿي رهيا آهن. گهڻن پڙهندڙن جي فائدي ڪاڻ هن ڪتاب کي ”سنڌ سلامت آن لائين ڪتاب گهر“ تي آڻي رهي آهيان. هن کان اڳ پڻ منھنجا ڪافي ڪتاب آن لائين پڙهڻ لاءِ موجود آهن. جن جو مطالعو وسيع پئماني تي ٿي رهيو آهي. سنڌ سلامت ڪتاب گهرجي سرواڻ ادا محمد سليمان وساڻ ۽ سندن سٿ جي ٿورائتي آهيان جن جي ڪري منھنجو لکيل پورهيو مڃتا ماڻي رهيو آهي. اميد تہ هيءُ ڪتاب پڻ مقبولِ عام ٿيندو.

ڊاڪٽر پروين موسيٰ ميمڻ
رابطو:03332766564
محمد موسيٰ ادبي اڪيڊمي،
ڏيپلائي ٽائون، حيدرآباد، سنڌ.