منظور ڪوهيار

نامياري ڪھاڻيڪار، ناول نگار، ڪالم نگار ۽ ڊراما نگار منظور ڪوھيار جو پورو نالو منظور حسين ولد ولايت خان آھي، منظور ڪوھيار 2 جون 1955ع تي  لاھوري محلي لاڙڪاڻي ۾ جنم ورتو. سندس تعليم ايم اي سوشيالاجي (گولڊ ميڊلسٽ) ۽ ايل.ايل.بي سنڌ يونيورسٽي مان پاس ڪيائين آھي ۽ پوسٽ گريجوئيٽ ڊپلوما هائوسنگ پلاننگ اينڊ بلڊنگ نيڌرلينڊ(هالينڊ) مان ڪيل اٿس.  لوڪل گورنمينٽ ڊپارٽمينٽ ۾ نوڪري ڪندي ڊپٽي ڊائريڪٽر سنڌ بلڊنگ ڪنٽرول اٿارٽي لاڙڪاڻو پڻ مقرر ٿيو.
منظور ڪوھيار لکڻ جي شروعات 75-1974ع کان ڪئي. سندس پھرين ڪھاڻي ”سرڳواسي طوطا رام“  آھي. منظور ڪوھيار ڪھاڻين جي ڪتابن کان علاوہ ڪيترا ئي اسٽيج ڊراما، ٽي وي ڊراما، ادبي ڪالم ۽ ڊاڪيومينٽريز ۽ سفرناما لکيا آھن. کيس مڃتا طور ڪيترا ئي ايوارڊ ملي چڪا آھن. اسٽيج ڊرامن ۾ ”جنرل شاھ بھارو“، ”جهڪر“، ”آواز“، ”رسمن جي انگاس تي“ وغيرہ ۽ ٽي وي ڊرامن ۾ ”ڪارا ڪڪر“، ”وفائون منتظر آھن“ ”سياست“، ”رَوشِ“، ”رواج“ ۽ ”تپش“ مشھور آھن.
منظور ڪوھيار جا ڇپيل ڪتاب:
•    “سج لھڻ کان پوءِ بہ“ (ڪھاڻيون) 1995ع، 
•    ”فراق جي منزل“ (ڪھاڻيون) 2007ع، 
•    ” فڪر ڦرهي هٿ ۾ “ (ڪالم ) 2007ع 
•    ”سچا ڪوڙا رشتا“ (ڪھاڻيون) 2009ع
•    ”راج ڪرتھہ“  (اسٽيج ڊراما) 2013ع 
•    ”ڪي ڪي ماڻهو وديا ساگر“ (خاڪا ۽ مضمون) 2010ع
•    ”ڀؤنرن جي انتظار ۾“  (مختصر مختصر ڪھاڻيون) 2012ع
•    ”ماھتاب“  (اسٽيج ڊراما) 2014ع 
•    ”طريقت جو سج“  (ناول) 2020ع
•    ”ڊي ناڪ 109“  (ناول) 2023ع
•    ”گهر ۽ گرامو فون“ (ڪھاڻيون) 2024ع