سنڌ جو ھڪ متحرڪ ڪردار ۽ سنڌ جو عاشق شوڪت سنڌي ادبي ۽ سماجي سرگرمين کانسواءِ سياسي سرگرمين ۾ بہ ڀرپور حصو ورتو. 1960ع ۾ سنڌ عوامي محاذ جو ڪنوينر رهيو، ان بعد سنڌ متحدہ محاذ دادوءَ جو ڪنوينر ۽ سينٽرل ڪاميٽيءَ جو ميمبر رهيو. نيشنل عوامي پارٽي (نعپ) ضلعي دادوءَ جو جنرل سيڪريٽري رهيو ۽ جيئي سنڌ محاذ جو ضلعي ڪنوينر بہ رهيو. پاڻ 1960ع جي قومپرست تحريڪن جو روح روان رهيو، سنڌيءَ ۾ ووٽر لسٽون شايع ڪرائڻ، ون يونٽ خلاف جلسا جلوس ڪڍرائڻ، سنڌ جي ريلوي اسٽيشنن تي سنڌيءَ ۾ نالا لکرائڻ، سنڌي ٻوليءَ کي قومي ٻوليءَ جو درجو ڏيارڻ، ايم آر ڊي جي تحريڪ  سميت هر جدوجھد ۾ اڳ کان اڳڀرو رهيو، جنھن جي نتيجي ۾ ڪيترائي ڀيرا جيل پڻ ويو.