وسيم آڪاش سيتائي شاعريءَ جي ڪئنواس تي پوپٽ جھڙا رنگ چٽيندڙ شاعر آھي. سندس شاعريءَ جو پھريون مجموعو ”هوائن ڇير ڇمڪائي“انهن ڏينھن ۾ ڇپيو آهي جڏهن سنڌ جي فضا گهُٽ ۽ ٻوسٽ ماري ماحول ۾ ھئي. اهڙي وقت ۾ وسيم آڪاش پنهنجي شعرن ۽ قلم جي نوڪ سان رنگين شعر جوڙي هوائن ذريعي ڇيرين کي ڇمڪائڻ جي ڪوشش ڪئي. وسيم آڪاش وٽ لفظن جو اڻ ڳڻيو خزانو آهي جنھن کي هو شاعريءَ جا ويس پارائي اسان سان شيئر ڪري ٿو. وسيم جي شاعريءَ مان لڳندو آھي تہ سندس شاعري انھن گُلن جيان آهي جيڪي پاڻ تہ وکري وڃن ٿا پر انھن جي خوشبو ماحول کي معطر بڻائي رکي ٿي. سندس لفظن جي مالھا ۾ سپنن جون سندرتائون بہ آهن تہ شاعريءَ جون سڀئي حُسناڪيون پڻ موجود آهن..