ڳليان پريم نگر ديان حضرت عشق گهمايم
جوڳي رمزان لايم........

موهيا ميم دي ماڻي، نازڪ ناز نماڻي،
دلدا دلبر ڄاڻي، متيان برهه ڀُلايم،
جوڳي رمزان لايم........

چلدا چاڪان دي چالي، ڦردا مست خيالي
للڪار ونجلي والي، صبر و آرام وڃايم،
جوڳي رمزان لايم........

رانجھا رنگپور راهي، ڪرڳيا تخت تباهي
من دا محرم ماهي، سهڻل سانگ بنايم،
جوڳي رمزان لايم........

پسني بيک بنا ڪي، آيا ويس مٽاڪي
ڏونهين نين لڙاڪي، ”غمدل“ نام ڌرايم،
جوڳي رمزان لايم........

غمدل فقير