مشهور افسانہ نگار، محقق، سنڌيڪار ۽ شاعرہ محترمہ تنوير جوڻيجو ڌيءُ صدرالدين جوڻيجو 6 فيبروري 1954ع تي ضلعي ٿرپارڪر جي شھر مٺيءَ ۾ ڄائي. ايم .اي سوشيالاجيءَ ۾ ڪيائين. تنوير جوڻيجو پنھنجي پروفيشنل زندگيءَ جي ابتدا 1973ع ۾ سنڌ يونيورسٽيءَ ۾ اسٽوڊنٽ ويلفيئر آفيسر طور ڪئي. 1974ع ۾ سنڌ يونيورسٽيءَ جي سماجيات (سوشالاجي) شعبي ۾ ليڪچرار مقرر ٿي. سڄي ڄمار انھيءَ شعبي سان سلھاڙيل رهي. نوڪريءَ دوران ساڳئي ئي شعبي ۾ ڊاڪٽريٽ جي سند حاصل ڪيائين. آخر ۾ هن شعبي جي پروفيسر ۽ چيئرپرسن طور رٽائر ڪيائين.
سندس ڪھاڻين جو موضوع سنڌي عورت سان سماج ۾ ٿيندڙ ويساهه گهاتيون آهي. ان کان سواءِ سماجيات تي مضمون ۽ ڪتاب لکيل اٿس. هن سماجيات (sociology) جي لغت پڻ ترتيب ڏني آهي، جيڪا سنڌي لئنگئيج اٿارٽيءَ پاران شايع ٿي چڪي آهي. 2004ع ۾ سندس هڪ ڪتاب ’عورت، سماج ۽ ڏاڍ ‘ جي عنوان سان ڇپيل آهي، هن ڪتاب ۾ سنڌيءَ ۾ لکيل عورتاڻي ادب جي تفصيلي ڇنڊڇاڻ ڪيل آهي. 
تنوير جوڻيجو ادبي دنيا ۾ پنهنجو هڪ خاص مقام رکي ٿي. هن هيٺيان ڪتاب لکيا آهن

• امرت منجھ ڪڙاڻ (ڪھاڻيون)، 1978ع
• عيبن هاڻي (ڪھاڻيون)، 1981ع
• ٻارن لاءِ چونڊ ڪھاڻيون (ترجمو) 1985ع
• ڌمڪ ڌم (ٻارن جا گيت ـــ ترجمو)
• قديم آثارن وارا ماڳ (تحقيق) 1986ع
• سماجيات جا اصول (تدريس) 1981ع
• سماجيات جي لغت
• عورت، سماج ۽ ڏاڍ، 2004ع

تنوير جوڻيجو ريڊيو پاڪستان حيدرآباد جي مختلف پروگرامن ۾ هڪ ميزبان ۽ ليکڪا طور حصو ورتو.

سنڌسلامت ڪتاب گهر تي تنوير جوڻيجو جا ڪُل 3 ڪِتاب موجود آھن