ذوالفقار راشدي

سنڌ جي نامياري شاعر، اديب ۽ صحافي ذوالفقار راشديءَ جو پورو نالو سيد ذوالفقار علي ولد سيد محمد امام شاھ راشدي ھو. سندس جنم 10 مارچ 1938ع تي پير جي ڳوٺ، ضلعي لاڙڪاڻي ۾ ٿيو. ذوالفقار راشديءَ بنيادي طور تي علمي ۽ ادبي ماحول ۾ پرورش حاصل ڪئي، ان ڪري علم ۽ ادب کيس ورثي ۾ مليو. پاڻ ھڪ زميندار بہ ھو. ھن شاعريءَ جو آغاز 1949ع کان ڪيو. سندس پھريون غزل ’اسان جي منزل‘ جي عنوان سان 1952ع ۾ ڇپيو. ذوالفقار راشدي جديد شاعرن ۾ صف اول جو شاعر ٿي گذريو آھي. ھن سنڌيءَ ۾ افسانا ۽ مضمون بہ لکيا. سندس دلچسپي صحافت سان پڻ رهي. 1953ع ڌاري لاڙڪاڻي مان جاري ٿيندڙ ھفتيوار اخبار ’هاري‘ جو ايڊيٽر بہ رهيو، جنھن کانپوءِ 1960ع ڌاري لاڙڪاڻي مان ئي ھفتيوار رسالو ’مذھب- انسانيت‘ بہ جاري ڪيائين. ان سان گڏوگڏ مختلف اخبارن ۽ رسالن ۾ سندس لکڻيون شايع ٿينديون رهيون. ذوالفقار راشديءَ جي شاعريءَ جو ڪتاب ’سوچ کي لوچ‘ (1980ع) ۽ ’ڪسوٽي‘ (1982ع) شايع ٿي چڪا آھن. ذوالفقار راشديءَ جي شاعريءَ ۾ لفظن جي چونڊ منفرد ۽ جداگانہ ھوندي آھي. ھن جون سوچون ۽ خيال جديد ۽ ترقي پسند ھئا. ھن غزل جي شاعريءَ ۾ پنھنجن ھمعصرن کان مختلف ھو ۽ ڪنھن جو مقلد نہ ھو. ھن جي ٻولي سادي، ترڪيبون ۽ تشبيھون نج ۽ نيون ھونديون ھيون. سندس شمار غزل جي اھم شاعرن ۾ ٿئي ٿو. ذوالفقار راشديءَ، 26 آگسٽ 1986ع تي چانڊڪا اسپتال لاڙڪاڻي ۾ وفات ڪئي.