سيد عطا حسين موسوي

سيد عطا حسين ولد سيد ويڌل شاھ موسوي 28 آڪٽوبر 1898ع تي روھڙي ۾ پيدا ٿيو. ھن ابتدائي تعليم روھڙيءَ مان حاصل ڪئي، 1917ع ۾ سنڌ مدرسي ڪراچيءَ مان مئٽرڪ ۽ 1921ع ۾ بي. اي پاس ڪيائين. انھيءَ سال کيس شڪارپور ھاءِ اسڪول جو استاد مقرر ڪيو ويو. 1923ع ۾ ھن بمبئيءَ مان بي. ٽي جو امتحان پاس ڪيو. ان کانپوءِ ھي نوشھري مدرسي ۾ استاد مقرر ٿيو. ڪجهہ وقت کانپوءِ نور محمد ھاءِ اسڪول حيدرآباد جي بورڊنگ ھائوس جو سپرنٽينڊنٽ ۽ گورنمينٽ ھاءِ اسڪول حيدرآباد جو استاد ٿي رهيو. ان کانپوءِ ميرپورخاص ھاءِ اسڪول ۾ 1927ع ڌاري ھيڊماستر مقرر ٿيو. ان دوران ھن عليڳڙھہ يونيورسٽيءَ مان ايم. اي جو امتحان پاس ڪيو. ان کانپوءِ ھن کي ڪجهہ وقت لاءِ مُلا اسڪولن جو ڊپٽي ايجوڪيشنل انسپيڪٽر مقرر ڪيو ويو. 1929ع ۾ ضلعي ٿرپارڪر جي اسڪولن جو ائڊمنسٽريٽو آفيسر مقرر ٿيو. 1941ع ۾ کيس اتر سنڌ جي اسڪولن جو اسسٽنٽ ايجوڪيشنل انسپيڪٽر مقرر ڪيو ويو. 1947ع ۾ کيس زميندار ڇوڪرن جي اسڪولن لاءِ ڊائريڪٽر ڪري رکيو ويو. 1950ع ۾ کيس سنڌ جو ڊپٽي ڊائريڪٽر اسڪولس مقرر ڪيو ويو، جنھن عھدي تان 1953ع ۾ رٽائر ٿيو. سيد عطا حسين شاھ جي باري ۾ ’جي. ايم سيد‘ پنھنجي ڪتاب ’جُنب گذاريم جن سين‘ ۾ لکي ٿو تہ: ھن جتي بہ نوڪري ڪئي تہ ان حد جي زميندار ۽ زيردستن سان دوستانا تعلقات قائم ڪيا، جيڪي زندگيءَ جي آخر دم تائين رهيا. تر جي ماڻھن جون وس آھر خدمتون سرانجام ڏنائين. سيد عطا حسين شاھ ڪيترا ڪتاب پڻ تصنيف ڪيا، جن ۾: (1) ’ڪچ ڪوڏيون‘ ۽ (2) پير ميان صاحبڏني شاھ بلڙيءَ واري جي ڪافين جو ڪتاب قابل ذڪر آھن.
سيد عطا حسين شاھ 8 جون 1966ع تي وفات ڪئي. سندس ٻہ فرزند سيد شفقت حسين شاھ موسوي ۽ سيد امداد حسين شاھ ھئا، جن مان سيد شفقت حسين شاھ سنڌ اسيمبليءَ جو 1953ع ۾ ميمبر چونڊيو ۽ پارليامينٽري سيڪريٽري پڻ رهيو.