پروفيسر ڊاڪٽر عبدالغفور ميمڻ

پروفيسر ڊاڪٽر عبدالغفور ميمڻ ولد محمد اسماعيل ميمڻ، لاڙ جي شھر دڙي، ضلعي ٺٽي (هاڻوڪي ضلعي سجاول) ۾، 25 آگسٽ 1962ع تي جنم ورتو. مئٽرڪ تائين تعليم پنھنجي ڳوٺ مان حاصل ڪيائين، انٽر گورنمينٽ ڪاليج سجاول مان ڪرڻ بعد 1980ع کان اسٽيل مِل ۾ مزدور جي حيثيت ۾ ڪم ڪرڻ لڳو. شفٽن ۾ ڊيوٽي ڪرڻ سان گڏ پاڻ ڪراچي يونيورسٽيءَ ۾ داخلا ورتائين، جتان ايم. اي (سنڌي) 1992ع ۾ فرسٽ ڪلاس فرسٽ پوزيشن ۾ حاصل ڪري گولڊ ميڊل حاصل ڪيائين. ھن ڪراچي يونيورسٽيءَ مان فلسفي ۾ پڻ ايم. اي ڪئي. 1995ع ۾ پي. ايڇ. ڊي ۾ رجسٽر ٿيو، جتان 2000ع ۾ پروفيسر ڊاڪٽر فھميدہ حسين جي رهنمائيءَ ۾ ‘سنڌي ادب جو فڪري پس منظر’ تي ٿيسز لکي ڪراچي يونيورسٽيءَ مان پي. ايڇ. ڊي جي ڊگري ورتائين. ايم. اي ڪرڻ کان پوءِ اسٽيل مل جي تعليم کاتي ۾ استاد جي حيثيت سان پنجن سالن تائين پڙهائيندو رهيو. اسٽيل مل ۾ ڊائون سائزينگ جي ڪري پاڻ اتان نوڪري ڇڏي، شاھ لطيف ڀٽائي چيئر، ڪراچي يونيورسٽيءَ ۾ ريسرچ آفيسر جي حيثيت ۾ ڪم ڪرڻ لڳو. انھيءَ دوران 2001ع ۾ پاڻ ڪراچي يونيورسٽيءَ جي سنڌي شعبي ۾ ليڪچرار ٿيو، پر ڪنھن اسٽي آرڊر وٺي کيس جوائن ڪرڻ نہ ڏنو. ان وچ ۾ سنڌ حڪومت جي تعليم کاتي ۾ ليڪچرر لاءِ پبلڪ سروس ڪميشن جو امتحان پاس ڪيائين، پر پوسٽنگ سانگهڙ ۾ ملڻ ڪري نوڪري جوائن نہ ڪيائين. آخر 2003ع ۾ ڪيس ختم ٿيڻ ۽ اسٽي خارج ٿيڻ کانپوءِ پاڻ ڪراچي يونيورسٽيءَ جي سنڌي شعبي ۾ اسسٽنٽ پروفيسر مقرر ٿيو. 2014ع ۾ سليڪشن بورڊ مان ڪاميابي ماڻي پروفيسر جي عھدي تي پھتو. ساڳئي سال پاڻ سنڌي شعبي جو چيئرمئن ٿيو. آڪٽوبر 2016ع ۾ ثقافت کاتي سنڌ جي سرچ ڪاميٽيءَ کيس سنڌي ٻوليءَ جي بااختيار اداري لاءِ چيئرمئن چونڊيو ۽ وزيراعليٰ سنڌ کي سفارشون موڪليون. جتان کيس آرڊر ملڻ جي نتيجي ۾ پاڻ 14 آڪٽوبر 2016ع تي چيئرمئن مقرر ٿيو. سندس لکڻين جو موضوع تصوف، نفسيات، فلسفو، ادبي تحريڪون، ادبي تنقيد، شاھ لطيف، لسانيات ۽ سماجي ۽ سياسي اڀياس آھن. پاڻ ھڪ ئي وقت ڪالم نويس، مضمون نگار، ڪھاڻيڪار ۽ محقق رهيو آھي. پاڻ 50 کان وڌيڪ مختلف ڪتابن جا مقدما پڻ لکيا اٿس. ڊاڪٽر صاحب ھن وقت ڪيترن جرنلن جي ايڊيٽوريل بورڊ ۾ شامل آھي. ساڳئي وقت ايڇ. اِي. سِي جي سنڌي نصابي ڪاميٽيءَ جو ڪنوينر آھي. علامہ اقبال اوپن يونيورسٽي اسلام آباد ۾ پاڪستاني ٻولين جي شعبي ۾ نصابي ڪاميٽيءَ جي ميمبر سان گڏ ايم. فل ۽ پي. ايڇ. ڊيءَ جو ٽيوٽر ۽ سڀني يونيورسٽين جي سنڌي ايم. فل ۽ پي. ايڇ. ڊي ٿيسز جو examiner آھي. پاڻ 2017ع کان ٻن سالن لاءِ بورڊ آف سيڪنڊري ايجوڪيشن ڪراچيءَ جي بورڊ آف گورنرس جو ميمبر آھي. 2018ع کان پاڻ مرزا قليچ بيگ چيئر، يونيورسٽي آف سنڌ ڄام شورو جي بورڊ آف گورنرس جو ميمبر آھي. پاڻ شاگرديءَ واري دور ۾ سياسي طور ڊي. ايس. ايف ۾ سرگرم رهيو. ادبي زندگيءَ جي شروعات 1991ع کان ڪيائين. سنڌي ادبي سنگت، گلشن حديد جو چار ڀيرا سيڪريٽري رهيو. اڄ بہ سنگت جو ميمبر آھي.
ڊاڪٽر عبدالغفور ميمڻ جا ست ڪتاب لکيل آھن، جن ۾: (1) ‘جتي نينھن اڇل’ (ڪھاڻين جو مجموعو: 1995ع)، (2) ‘سنڌي ادب جو فڪري پس منظر (تحقيق: 2002ع)، (3) ‘گلدستو’ (نصابي ڪتاب: 2004ع)، (4) ‘انسان، سماج ۽ فطرت’ (سماجي، فڪري ۽ نفسياتي مضمونن تي ٻَڌل ڪتاب: 2005ع)، (5) ‘شاھ لطيف جا فڪري رخ’ (تحقيق: 2015ع)، (6) ‘جديديت پڄاڻان’ (تنقيد: 2016ع)، ۽ (7) ‘سنڌي سماج، نفسياتي اصطلاحن جي آئيني ۾’ (نفسيات جي موضوع تي ڪتاب: 2017ع) شامل آھن. سندس پي. ايڇ. ڊي جو مقالو ڪافي شھرت ماڻي چڪو آھي. جنھن جا ٻہ ايڊيشن شايع ٿي چڪا آھن. پھريون ايڊيشن 2002ع ۾ شاھ لطيف ڀٽائي چيئر ڪراچي يونيورسٽيءَ پاران ڇپايو ويو، ٻيو ايڊيشن 2017ع ۾ سنڌي ٻوليءَ جي بااختيار اداري پاران ڇپايو ويو. ھي ڪتاب ڪيترين ئي يونيورسٽين پنھنجي نصاب ۾ شامل ڪيو آھي. ڊاڪٽر صاحب جا 40 کان مٿي تحقيقي مقالا مختلف جرنلز (جيڪي HEC کان منظور ٿيل آھن) ۾ ڇپجي چڪا آھن. مختلف موضوعن تي 200 کان وڌيڪ مضمون مختلف اخبارن ۽ رسالن جھڙوڪ: عوامي آواز، جاڳو، سنڌ ايڪسپريس، ساڃاھہ، سوجهرو ۽ ھمسري ۾ شايع ٿي چڪا آھن. پاڻ ڪيتريون ئي قومي ڪانفرنسون ۽ سيمينار منعقد ڪرايا اٿس ۽ ڪيترين بين الاقوامي ۽ قومي ڪانفرنسن ۾ تحقيقي مقالا پڙهي چڪو آھي. سندس ڪيترا ڪالم مختلف اخبارن ۾ ڇپجندا رهيا آھن. ڊاڪٽر صاحب ادبي خدمتن جي مڃتا ۾ ڪيتريون شيلڊون، ميڊل ۽ سرٽيفڪيٽ حاصل ڪري چڪو آھي.