نگاھن جا سجدا

رخسانہ پريت پنھنجي شاعريءَ جي سڃاڻپ لاءِ جيڪي گهاڙيٽا گهڙيا آھن انھن کيس الڳ سڃاڻپ ڏني آھي. سندس شاعريءَ جا موضوع انسان جي ڪيفيتن سان گڏ اردگرد ٿيندڙ زندگيءَ جا حالتن جا ڏس ڏين ٿا. سندس جديد شاعريءَ ۾ ڪلاسيڪيت جو بہ رچاءُ نظر اچي ٿو. رخسانہ پريت بنيادي طرح غزل جي شاعرہ آھي. ھن وٽ غزل جو پنھنجو رنگ ۽ ڍنگ آھي. سندس غزل ۾ مجموعي طور تي رومانوي رنگ ڇانيل نظر اچي ٿو. ساڳي وقت رخسانہ پريت جو غزل ڪنھن حد تائين سماج سان بغاوت ڪندي نظر اچي ٿو. هوءَ عام رواجي شعر چوڻ بدران غزل ۾ جرئت آڻي پنهنجي احساسن ۽ جذبن جو بيان بيباڪيءَ سان ڪري ٿي.