4 مارچ 1967ع تي ھلايل شاگرد تحريڪ جو اثر اڄ بہ ملڪ جي سياست تي موجود آھي. 4 مارچ جي اھا تحريڪ جنھن ۾ احتجاج ڪندڙن تي وحشياڻو تشدد ڪندي گرفتاريون ٿيون ۽ 207 شاگرد زخمي ڪيا ويا ھئا. اڳتي هلي انھن شاگردن مان ڪيترائي ڪامياب سياستدان، سائنسدان، دانشور، اديب، ليکڪ، شاعر، وڪيل، انجنيئر، ڊاڪٽر پروفيسر ۽ ٻين اعليٰ سول توڙي ملٽري عھدن تي پھتا. 4  مارچ جو واقعو سنڌ جي قومي، طبقاتي ۽ جمھوري جدوجھد جي جديد تاريخ جي اهم ۽ وڏن مان هڪ اهم واقعو آهي، ھن واقعي پٺيان سنڌي ٻوليءَ ۽ تعليم خلاف ٿيندڙ سازشن ۽ سنڌ جي قومي وجود کان انڪار وارين ڪوششن تي سنڌ جي نوجوانن جي ڪاوڙ ۽ ڪروڌ جو ھڪ اھڙو اظھار ھو، جيڪو طوفان جي صورت وٺي رھيو ھو.