سنڌو اشاعت گهر، ڪراچيءَ طرفان، ڪيل اعلان مطابق ”درد جو صحرا“ جي بجاءِ، سنڌ جي مشھور، مقبول ۽ منفرد ڪھاڻيڪار خاتون، محترمہ ڀيڻ ماھتاب محبوب جي چونڊ ۽ شاھڪار ڪھاڻين جو پھريون مجموعو، ”چانديءَ جون تارون“ خدمت ۾ پيش ڪري رھيا آھيون. پاڪستان ۽ سنڌ جي تاريخ ۾، ھي پھريون ڀيرو آھي جو ڪنھن جديد سنڌي ڪھاڻيڪار خاتون جي تخليقي ڪارنامي کي، ڪتابي صورت ۾ پيش ڪيو پيو وڃي. جيتوڻيڪ اھا ڪا فخر جي ڳالھہ نہ آھي، پر بيحد افسوس جو مقام آھي جو اسانجا قومي ۽ ادبي ادارا، قبرستانن مان مَڙھَ ڪڍيو، انھن جي نمائش ۾ فخر محسوس ڪن ٿا پر سنڌ جو ’نئون ادب‘ جيڪو ھن وقت دنيا جو عظيم ترين ’ادب‘ سمجهيو وڃي ٿو، ان جي نشر و اشاعت لاءِ ڪوبہ جوڳو انتظام نہ ڪيو آھي. بھرحال، ”چانديءَ جون تارون“ جي اشاعت تي اسانکي فخر آھي.
محترمہ ماھتاب محبوب جي ادبي حيثيت ۽ شخصيت ڪنھن رسمي تعارف جي محتاج نہ آھي. ادي ماھتاب اٽڪل ڏھن يارھن سالن کان لڳاتار لکندي اچي ٿي. سندس ڪھاڻيون، سنڌ جي سڀني معياري ادبي رسالن ۾، شايع ٿينديون رھن ٿيون... نئين ڪھاڻي جي سلسلي ۾ ماھتاب جو بلند مقام آھي. ھن جون ڪھاڻيون نہ فقط انساني معاشري جون عڪاس آھن، پر جديد ڪھاڻي جي جملي قدرن ۽ رجحانن جي تڪميل جي مڪمل صورت پڻ آھن. اسين ائين تہ ڪونہ چونداسين تہ ماھتاب جو فن، عظمتن سان ھمڪنار آھي، پر ايترو سو ضرور چئبو تہ سندس فن عظمت جي بلندين کي ڇُھيو ضرور آھي. ھن جي فن ۾ جيڪا پختگي، منظر ڪشي ۽ ڀرپور ڪردار نگاري نظر اچي ٿي، ان مان اندازو لڳائي سگهجي ٿو تہ سندس فن، عظمت جي ڪسوٽيءَ تي ڪيتري قدر ٺھڪي اچي ٿو.
ھن مجموعي ۾، ماھتاب جون سورنھن بھترين ڪھاڻيون ڏنيون ويون آھن، جيڪي ھن کان اڳ، سنڌي افسانوي ادب ۾ وڏو مقام رکن ٿيون . Description، موضوع، ٽيڪنڪ ۽ Treatment جي لحاظ کان ھر ڪھاڻي، ھڪ نئون ۽ انوکو تاثر رکي ٿي. ڪردار نگاري تہ بيحد بي مثال چئي سگهجي ٿي. طويل توڻي مختصر ليڪن سادن جملن ۾، ڪردار جو اھڙي ريت تہ تجزيو ڪري ٿي جو افساني تي حقيقت جو گمان ٿيو پوي. ڀوري وڇ، بليٽن، نڪ، ناسور، ڪارونانگ، خيران، شڪي، سوڍا واٽر، روئي ڏنو رات، واريءَ سندو ڪوٽ ۽ ٻيون ڪيئي ڪھاڻيون ان سلسلي ۾ بھترين مثال آھن.
’روئي ڏنو رات‘ ۽ ’واريءَ سندو ڪوٽ‘ ٻيئي اڻ ڇپيل ۽ شاھڪار ڪھاڻيون آھن. ’واريءَ سندو ڪوٽ‘ تہ موضوع، ڊسڪرپشن ۽ ٽريٽمينٽ جي لحاظ کان ھڪ لازوال ڪھاڻي آھي. اسانکي اميد آھي تہ پڙھندڙ ۽ لکندڙ طبقي ۾ ھي ڪتاب، پنھنجي مواد، ڇپائي، نفاست ۽ خوبصورتي جي لحاظ کان پسند ڪيو ويندو.
تاج بلوچ
(ناشر)
تاريخ 25 مئي، 1970ع
ڪراچي
