ارپنا
جن جا ضمير اڃان تائين زندھ آھن،
۽ جن جي فنڪاراڻي اَنا، ڪنھن بہ غاصب،
ڪنھن بہ ديسَ دروھيءَ،
حڪمران اڳيان، ھٿ ٽنگي، ڪنڌ جهُڪائي،
قلم جي تقدس کي،
ڪاڻيارو ناھي ڪيو -!!!
ھي ڪتاب امر ساھڙ جي شاعريءَ جو پھريون مجموعو آهي. ايوب کوسو لکي ٿو: ”امر ساھڙ جي سندس محبوب جي مُرڪ جھڙي شاعريءَ کي پڙهڻ کان پوءِ آئون دعوي سان چوان ٿو تہ امر ساھڙ سنڌ جي نئين ٽھيءَ جو نہ رڳو نمائندو شاعر آھي، پر اُن سان گڏ اها بہ حقيقت آھي تہ موجودہ وقت ۾ سنڌ جي هن خوبصورت خِطي ٿر ۾ امر ساهڙ هڪ اعلي پايي جي شاعر جو رتبو رکي ٿو. ”اکين ۾ الڪا“ جو عُنوان خود سنڌ جو المياتي عڪاس آهي. سچ بہ اهو آھي تہ سنڌ جي هر اک اُلڪي جي علامت بڻيل آهي ۽ هر دل نئين نسل جي نسل ڪشيءَ جو نوحو بڻيل آهي.“