جذبا جانان! تون ڇا ڄاڻين؟
ڳوڙھن معنا، تون ڇا ڄاڻين؟
احساسُن جي تنھائيءَ کي،
ماڻھو ادنا! تون ڇا ڄاڻين؟
ننڊ-ننگر ۾ ڪير اُڻي ٿي،
يادن-سپنا، تون ڇا ڄاڻين؟
موت نہ بخشي معنا توکي،
جيوَنَ! ورنا، تون ڇا ڄاڻين؟
تون کانپوءِ روز ملن ٿا،
مون کي طعنا، تون ڇا ڄاڻين؟
ھِن دل جا دستور نرالا،
او ديوانا! تون ڇا ڄاڻين؟
مُنھنجن اکڙين ۾ ھِن ڪيئي،
مَئي-خانا، تون ڇا ڄاڻين؟
جِسمَ ڪُنواري منجه ڪُراڙا!
جهرمِر جُگنا، تون ڇا ڄاڻين؟
روُح امر جو رھڙي نڪتي،
راڻي! رچنا، تون ڇا ڄاڻين؟