لطيفيات

شاھ لطيف جي شاعريءَ ۾ جماليات

ھي ڪتاب ڊاڪٽر شير مھراڻي جي 2012ع ۾ ڪراچي يونيورسٽي ۾ پي ايڇ ڊي ٿيسز جي مقالي تي مشتمل آھي، جنھن جو نگران ڊاڪٽر غفور ميمڻ ھيو. ھن مقالي ۾ ڊاڪٽر شير مھراڻيءَ سونھن جي سموري تاريخ تي انتھائي برجستي انداز سان قلم کنيو آھي. ھن جماليات جي اوسر، تاريخ، مذھبن ۾ جماليات جي تصور، جماليات جي مختلف قسمن، جديد فلسفي ۾ جماليات جي تصور، تصوف ۾ جماليات جي تصور ۽ ڀٽائيءَ وٽ جماليات جي تصور ۽ شاھ جي رسالي جي مختلف سُرن ۾ جماليات جي تصور تي عالماڻي انداز سان لکيو آھي.

Title Cover of book AESTHETICISM IN THE POETRY OF SHAH LATIF

سونھن يا جماليات

سونھن يا جماليات بابت مختلف ڏاهن جي ويچارن مان اسان سونھن جا ڪيترائي قسم تعبير ڪري سگهون ٿا. هونئن تہ سونھن جون ايتريون تہ لامحدود ڏسائون آهن جو انھن کي پوري طرح “ڊسڪور” ڪرڻ ناممڪن نہ تڏهن بہ تمام گهڻو مشڪل آهي. پر درجي بندي Classification وسيلي سونھن کي سمجهڻ لاءِ نہ صرف سولائي ٿيندي بلڪہ ان جا گهڻا پاسا، ڏسائون ۽ مختلف جھتون سامھون اچي سگهن ٿيون.
هن کوجنا وسيلي سونھن جا جيڪي قسم مختلف ڏاهن جي تجربن مان وصول ٿيا آهن يا سمجهہ جي دائرن ۾ آيا آهن؛ انھن ۾ فطري سونھن، جسماني سونھن، وجداني سونھن، درد جي سونھن، ڏاهپ جي سونھن، فني سونھن، نفسياتي سونھن، معروضي سونھن، موضوعي سونھن ۽ ازلي سونھن وغيرہ شامل آهن. ٿيسزز جي هن باب ۾ جماليات جي جن قسمن ۽ ڀٽائيءَ وٽ انھن جي تصور کي بحث هيٺ آندو ويندو اهي آهن:
فطري جماليات، درد جي جماليات، وجداني جماليات ۽ فني جماليات. جماليات جي انھن قسمن جي مناسب تشريح سان گڏ شاھ صاحب وٽ انھن جي تصور تي جوڳو بحث ٿيسزز جي هن باب ۾ شامل آهي.