ناشاد رحم علي

ناول نگار، ڪھاڻيڪار، خاڪا نويس، مضمون نگار  ۽ مقالا نويس  ناشاد رحم علي 15 مارچ 1977ع تي ٿر جي شھر اسلام ڪوٽ لڳ ڳوٺ ملھي جو تڙ ۾ ڄائو. گورنمنٽ ھاءِ اسڪول اسلام ڪوٽ مان 1994ع ڌاري مئٽرڪ، 1997ع ڌاري گورنمنٽ ڊگري ڪاليج مٺيءَ مان بي اي ڪرڻ بعد سنڌ يونيورسٽيءَ مان سوشيالاجيءَ ۾ ماسٽرس ڪيائين. مختلف سنڌي اخبارن ۽ رسالن ۾ بيشمار ليک لکڻ سان گڏ ريڊيو پاڪستان حيدر آباد جي علمي ۽ ادبي پروگرامن ۾ کوڙ تحريرون بہ لکيائين. ڪجھہ وقت ”ٿر پچار“ نالي مقامي اخبار جو ايڊيٽر رهڻ بعد گهڻو وقت ريڊيو پاڪستان مٺيءَ تي بطور ڪمپيئر ، مقبول ترين ادبي پروگرامن جي ميزباني بہ ڪندو رهيو، جتان ڪيترن ئي نون لکندڙن جي ٽيلنٽ کي پالش ڪري سنڌ واسين اڳيان آندائين. ڪن شاعرن ۽ ليکڪن جي ڪتابن ۽ تخليقن تي لکيل سندس رايا پڻ ادبي ڪٿ ڪندڙ ۽ تنقيد توڙي تحسين جي حوالي سان بيحد وزندار آھن. .2006ع ۾ ڇپيل سندس ڪتاب ”ڀٽن جي ڀُڻ ٻُڻ“ ٿر جو بلڪل ئي الڳ چھرو ڏيکاريندڙ آھي. ناشاد رحم علي جا ناول سنڌ جي عام زندگي جا رنگ ڏيکارڻ سان گڏ فني ۽ فڪري حوالي سان بيحد سگهارا آھن .ناشاد رحم علي سرڪاري يا غير سرڪاري نوڪري ڪرڻ بدران پنھنجي ڳوٺَ ۾ مائٽاڻي زمينداري سنڀالڻ سان گڏ ڪيٽل فارمنگ بہ ڪندڙ آھي، جتي ھُو نج فطرت جي ڀاڪر ۾ لکڻ ۽ پڙهڻ جي ڪم سان گڏوگڏ قيمتي جانور پالڻ جو شوق بہ پورو ڪري رهيو آھي. ڪاموريون ٻڪريون، ڪانڪريچ ڍڳيون ۽ ڪاٺياواڙي گهوڙا کيس گهڻا وڻندا آھن. ڪرڪيٽ کيڏڻ، ۽ ڀٽن تي ڌنارن سان گڏ مال چارڻ سندس مشغلن ۾ شامل آھن.
ناشاد رحم علي جا ھيستائين اٺ ڪتاب ڇپيا آھن، جن ۾ ”ھوا جا نيڻ“ (شاعري. 2005ع ڪنول پبليڪيشن)، “ڀٽن جي ڀُڻ ڀُڻ “ (مضمون/مقالا. 2006ع ڏياٽي پبليڪيشن)، ”اڄ گُهرجين ھت“ (بائيوگرافي 2011ع ڏياٽي پبليڪيشن)، “ھينئڙو ٻہ اڌ“ (ناول. پھريون ڇاپو 2016ع سنڌيا پبليڪيشن ۽ ٻيو ايڊيشن 2024ع ديبل پبلشرز)، ”ري سٽور ٿيل ماڻھپو“ (ناول 2017ع ڪنول پبليڪيشن)، ”وري وري وڃايل“ (ناول پھريون ڇاپو سنڌيا پبليڪيشن 2017ع ۽ ٻيو ڇاپو ديبل پبلشرز 2024ع)، “ڳاڙها لُڙڪ“ (ڪھاڻيون. سڦلتا پبليڪيشن 2024ع)، “لفافن ۾ لڪايل محبتون“ (ادبي خط ڪنول پبليڪيشن 2025ع) ۽ ”مُٺ ۾ موجود آسمان“ (خاڪا. سڦلتا پبليڪيشن 2025ع ) شامل آھن. آٽو بائيوگرافي جو ڪتاب ”اڻپورڻتا جو پنڌ“، تحقيق ۽ تنقيد تي مشتمل تاريخي ڪتاب “پنھنجو مقدمو“ ۽ “چري عورت جي ڊائري“ (ناول) اڻڇپيل آھن.