ڀوَن سنڌي جا ڪِتاب

سنڌي ٻولي جو ليکڪ ڀوَن سنڌي، اصل نالو ڀونداس پُٽ جئرامداس، ذات لوھاڻو، 11 جنوري 1954ع ۾ ٽنڊي باگي شھر ۾ ڄائو. پرائمري ۽ سيڪنڊري تعليم مير غلام محمد خان ٽالپر گورنمنٽ ھائي اسڪول ٽنڊي باگو، انٽر سائنس، مسلم ڪاليج حيدرآباد، ايم.ايس.سي (ڪيميسٽري)، سنڌ يونيورسٽي ڄامشورو، ايم.اي (اقتصاديات)، سچل ڪاليج حيدرآباد ۽ ايل.ايل.بي جو امتحان، سنڌ لاڪاليج حيدرآباد مان پاس ڪيائين. ڀوَن سنڌي ڪجھ عرصو وڪالت جي پيشي سان منسلڪ رھڻ کان پوء 1981 ۾ سنڌ جي تعليم کاتي ۾ بطور ليڪچرر ڀرتي ٿيو. اسلاميہ سائنس ڪاليج ڪراچي، گونمينٽ ڪاليج سجاول، بدين، قاسم آباد ۽ آخر ۾ گونمنٽ ڪاليج ڪوٽڙي مان 2014 ۾ ائسوسيئيٽ پروفيسر طور رٽائر ٿيو. نوڪري دوران ھن نصابي ذميوارين سان گڏوگڏ، شاگردن جي ذھني اوسر لاءِ غير نصابي سرگرميون پڻ ڪرايون، جھڙوڪ، تحريري ۽ تقريري مقابلا، وئرائٽي (ٽئلينٽ) شو، پڪنڪ ۽ ٽوئر وغيرہ. ساڳئي وقت نوڪري دوران اُستادن جي مسئلن لاءِ جوڙيل تنظيم سنڌ پروفيسرس اينڊ ليڪچررس ائسوسيئيشن جي ھلايل جدوجھد ۾ ھو مئي 1994 ۾ جيل ياترا بہ ڪري آيو. ڀوَن سنڌي ادبي ۽ سماجي سرگرمين ۾ حصو وٺڻ ۽ تقريرن ڪرڻ کان علاوہ سنڌي ادبي سنگت شاخ ٽنڊوباگو، سنڌ گريجوئيٽ ائسوسيئيشن شاخ ٽنڊوباگو، سنڌ پروفيسرس اينڊ ليڪچررس ائسوسيئيشن جو سرگرم عھديدار ۽ اولڊ بوائز ائسوسيئيشن ٽنڊوباگو جو باني ميمبر ۽ صدر پڻ رھيو آھي. نوڪري تان رٽائرمينٽ کان پوءِ ھن وقت ھو وڪالت جي پيشي سان واڳيل آھي. ڀوَن سنڌي شاعري ڪھاڻين، مضمونن، تاثرن، خطن،خاڪن ۽ ڏيھي توڙي پرڏيھي سفرنامن وغيرہ کان علاوہ پرڏيھي ٻولين جي ڪھاڻين جا ترجما پڻ ڪيا آھن، جيڪي مختلف وقتن تي اخبارن ۽ رسالن ۾ ڇپبا رھيا آھن. ھن وقت تائين ڀوَن سنڌي جا ھيٺيان ڪتاب ڇپجي چڪا آھن.

1. درد بڻيو دلرُبا (پرڏيھي ڪھاڻيون) ڇپيو نئون نياپو اڪيڊمي 2015. ھن ڪتاب کي سنڌي لئنگويج اٿارٽي پاران سال 2015 جو بھترين ترجمي جو ڪتاب قرار ڏنو ويو.)
2. گوري گهاگهر ۽ گوندر (پرڏيھي ڪھاڻيون) پھريون ڇاپو نئون نياپو پبليڪيشن 1985، ٻيون ڇاپو نئون نياپو اڪيڊمي 2015
3. محبت ماريا ماڻھو (پرڏيھي ڪھاڻيون) ڇپيو نئون نياپو اڪيڊمي 2016
4. ستارن پويان ڊوڙندڙ شخص (پرڏيھي ڪھاڻيون) ڇپيو نئون نياپو اڪيڊمي 2015
5. سندري، سپنا ۽ صليب (شاعري) ڇپيو جوڀن پبليڪيشن 1986
6. پراڻو قرض (پرڏيھي ڪھاڻيون) ڇپيو نئون نياپو اڪيڊمي 2019
7. اُگھاڙپ جو فلسفو (پرڏيھي ڪھاڻيون) ڇپيو نئون نياپو اڪيڊمي 2019
8. ڌرتيءَ جا چنڊ (مضمون/مقالا) ڇپيو نئون نياپو اڪيڊمي 2019
9. ھھڙا مانجھي مرڻا ناھن (مير غلام محمد خان ٽالپر تي ترتيب ڏنل مخزن 1976)
10. باراڻ (گونمنٽ ڪاليج ڪوٽڙي لاء 2013 ۾ ترتيب ڏنل مخزن)
11. برھم پترا (انيل گاف سان گڏ ترجمو ڪيل ناوليٽ 1981)