تڙ تڙ تي طوفان

شاعريءَ جو ھي مجموعو ڪلاسيڪل صنف بيت ۽ وائيءَ تي ٻڌل آھي، جنھن کي مختلف سُرن ۾ ورھائي ترتيب ڏنو ويو آھي. سُرن ۾ نوان موضوع کنيا ويا آھن، تنھنڪري ھي مجموعو بيت جي قديم صنف رکندي بہ جديد دور جو آواز سڏجي تہ بہ ان ۾ وڌاءُ ڪونھي. سُر سنڌوءَ ۾ سنڌو درياءَ جي شان، تاريخي تذڪري وارا بيت بہ آھن تہ ڌارين جي يلغار جو تاريخي ذڪر بہ آھي. سنڌ جو ڪيڏارو، سُر شھيد نذير عباسي، سُر کاھوڙي، سُر بختاور ۽ سُر روپلو مضمون ۽ عنوان جي لحاظ کان نرالا سُر آھن.  عزيز جي شاعريءَ ۾ ھر ھنڌ ڪاڇي جا عڪس بہ ملن ٿا تہ ڪاڇي جون موسمون بہ ملن ٿيون. ڪتاب ۾ عزيز جي خوبصورت خيالن، انيڪ منظرن، تاريخي حوالن، ڪاڇي جي ڳوٺن، ندين، نالن ۽ نين جو ذڪر پڻ ملي ٿو.