شاھ لطيف جا فڪري سرچشما

سنڌ سلامت ڪتاب گهر پاران نامياري ليکڪ، محقق، شاعر ۽ نثر نگار تاج جويي جو لکيل تحقيقي ڪتاب ”شاھ لطيف جا فڪري سرچشما“ اوهان اڳيان حاضر آهي. 

هي ڪتاب، شاھ لطيف جي فڪر، فلسفي ۽ ان جي ڪلام تي ٻين شاعرن جي اثر جي حوالي سان انتھائي اهم آهي. هن ڪتاب ۾ شامل مقالا بنيادي طور تي شاھ لطيف متعلق اهم ڪتاب آهن. شاھ لطيف جا فڪري سرچشما مقالي ۾ عربي، فارسي، هندي، پنجابي ٻولين جي اهم متقدمين شاعرن جي شاھ جي ڪلام سان پرک ڪئي وئي آهي. مقالي ”شاھ لطيف: منصور حلاج جو وڏي ۾ وڏو شارح “ ۾ پھريون ڀيرو شاھ لطيف جي ڪلام جي منصور حلاج جي عربي ڪلام سان ڀيٽ ڪري، 100 جي لڳ ڀڳ شاھ سائينءَ جا اهي بيت هن مقالي ۾ ڏنا ويا آهن، جيڪي يا تہ منصور حلاج جي فڪر جي اثر هيٺ آهن يا اشارتاً انھن ۾ منصور جو ذڪر موجود آهي يا جيڪي منصور جي عربي بيتن جي گھڻو ويجھو آهن. مقالي ”ديوان علي ۽ شاھ لطيف جي شاعريءَ جي تقابلي اڀياس“ ۾ پڻ پھريون دفعو حضرت علي عليہ السلام جي ‘ديوان عليءَ’ جي روشنيءَ ۾ شاھ جي رسالي جو مطالعو ڪيو ويو آهي. 

ھي ڪتاب 2013ع ۾ ماءِ پبليڪيشن پاران ڇپايو ويو، جنھن جي اسڪين ڪاپي صاحب خان ميراڻيءَ جي ٿورن سان سنڌ سلامت ڪتاب گهر ۾اپلوڊ ڪري رھيا آھيون.

مينيجنگ ايڊيٽر ( اعزازي )

سنڌ سلامت ڊاٽ ڪام

sulemanwassan@gmail.com

www.sindhsalamat.com

books.sindhsalamat.com