ڌرتي ماتا

سنڌ سلامت ڪتاب گهر پاران نامياري محقق، آرڪيالاجسٽ ۽ نثرنگار اشتياق انصاريءَ جو ھنگلاج ۽ لاھوت جي ڏورانھين سفر ۽ دنيا جي ڌرتي ماتائن تي لکيل معلوماتي ڪتاب ”ڌرتي ماتا“ اوھان اڳيان حاضر آهي.

هنگلاج ۽ لاھوت جي ڏورانھين سفر ۽ دنيا جي ڌرتي ماتائن تي لکيل هن معلوماتي ڪتاب ۾ سنڌ جي برن، جهنگلن، چشمن، جبلن ۽ جبلن ۾ٺھيل مورتين ۽ انھن مورتين سان جڙيل قصن جو ذڪر ڪيو ويو آهي.  ان کانسواءِ هن ڪتاب ۾ هنگلاج جي ياترين، ديوتائن، ديوين ۽ انھن جي آستانن تي ٿيندڙ ميلن ۽ رسمن جو ذڪر پڻ ٿيل آهي. 

معلومات جي هن کاڻ کي چئن حصن ۾ ورهايو ويو آهي، جنھن جي پھرين حصي ۾ هنگلاج، سونمياڻي شھر، حب ندي، سناتن ڌرم، دراوڙ قوم ۽ آتما جھڙن موضوعن کي چٽيو ويو آهي. هن ڪتاب جي ٻئي حصي ۾ هندو مذهب جي ديوتائن، جن ۾: برهما، وشنو، شِوَ، سوريہ پنٿ ۽ ان کانسواءِ ڌرتيءَ تي رهندڙ انسان جي  مختلف دؤرن کي پڻ مختصر بيان ڪيو ويو آهي. هن ڪتاب جي ٽئين ڀاڱي ۾ دنيا جي مشھور ڌرتي ماتائن يعني ديوتائن جو ذڪر پڻ ڪيو ويو آهي. هن ڪتاب جي آخري ڀاڱي ۾ سنڌ جي قديمي تيرٿ آستانن جو پڻ تفصيلي ذڪر ڪيو ويو آهي، جن ۾ گورکناٿ جو آستان، ڪالي ماتا جو آستان ۽ ميلو، هنگلاج ديويءَ جي پيدائش وغيره شامل آهن.

ھن ڪتاب جو پھريون ڇاپو 2001ع ۾ ۽ ٻيو ڇاپو 2017ع ۾ سنڌيڪا اڪيڊمي، ڪراچيءَ پاران ڇپايو ويو، جنھن جي پي ڊي ايف ڪاپي شير علي چانڊيي جي سھڪار سان اپلوڊ ڪري رھيا آھيون.

مينيجنگ ايڊيٽر (اعزازي)

سنڌ سلامت ڊاٽ ڪام

sulemanwassan@gmail.com

sindhsalamat.com

books.sindhsalamat.com