ھن آتم ڪھاڻيءَ ۾ شيخ عزيز نھايت ئي دلچسپ انداز ۽ وڏي بي باڪيءَ جو مظاھرو ڪندي، ڪافي حقيقتون سامھون آنديون آھن. ھن ڪتاب ۾ سنڌ جي تاريخ، مختلف جڳھين سان گڏ مختلف شخصيتن بابت نراليون ڳالھيون پڻ ڏنل آھن. ان سان گڏ پنھنجي صحافتي ڪم جي حوالي سان تمام گهڻو لکيو اٿس، جنھن ۾ عبرت اخبار جي شروعاتي دور کان ويندي انگريزي اخبار ڊان ۾ پنھنجي صحافتي ڪم ۽ لاھن چاڙھن جو ذڪر ڪري ٿو. سچ تہ شيخ عزيز جي ھي آٽو بايوگرافي سڄي زندگيءَ جي پيار جو پورھيو آھي، جنھن ۾ ھن بنا ڪنھن ملاوٽ جي واقعن ۽ مشاھدن کي بيان ڪيو آھي. ھڪ لحاظ کان ھي ڪتاب سنڌ جي سياسي، سماجي ۽ ثقافتي تاريخ پڻ آھي.