اھا 1984ع جي ڳالھہ آھي جڏھن ستٽيھہ سالن کانپوءِ موتي پرڪاش ۽ سندس وني ڪلا پرڪاش پنھنجي اباڻي وطن جا وڻ ڏسڻ لاءِ سنڌ آيا. سنڌ ۾ ھو رڳو 14 ڏينھن رھيا. ڪتاب ۾ 1947 ۾ برصغير ۾ آيل ورھاڱي واري زلزلي کانپوءِ جي خوف حراس ۽ سنڌ کي ڇڏڻ جو ڏکائتو احوال بہ آھي تہ وري سنڌ واپس ورڻ جي آس جا احوال پڻ آھن. ھو لکي ٿو تہ مون 1978ع کان وٺي ھر سال پاڪستان جي ويزا جي ڪوشش ڪئي، پر ناڪام ٿيندو رھيس. ڪتاب ۾ ڪيتريون ئي يادگيريون آھن، ڪٿائون آھن، سنڌ سان ازلي عشق جا قصا آھن، دردن جا داستان آھن ۽ سنڌين جي مھان نوازي جا قصا آھن.