نامياري شاعر ۽ نقاد بخشل باغيءَ جو اصل نالو الله بخش ولد محمد پريل خشڪ آهي، پر ادبي دنيا ۾ ”بخشل باغيءَ“ جي نالي سان سڏيو وڃي ٿو. سندس جنم 19 اپريل 1975ع تي، دولت ڪالوني نوابشاهه ۾ ٿيو. تعليم بي. اي اٿس. ڪچي ڦڪي شاعري 1988ع کان ۽ پختي شاعري 1991ع کان شروع ڪيائين. سندس شاعريءَ جا ڇپيل ڪتاب ھي آهن: (1) سمنڊ جي هن پار (1999ع)، (2) سپنو سنڌو ديس جو (2000ع)، (3) مٽيءَ جي خوشبوءِ (2003ع)، (4) آرسيءَ جا خواب (2004ع)، (5) ڊسمبر جي اڪيلائي (2006ع)، (6) درد جي ساڳي ڪٿا (2010ع)، (7) سنڌو ديسُ مهَانُ (2011)، (8) ناياب هين هم(اردو شاعري، 2016)، (9) سنڌڙيءَ جو سوڳنڌ (2021)، (10) خود ڪلاميءَ جو پورٽريٽ (2021)، (11) بارشن کي ڀِڄائي ڇڏيندڙ شاعري (2022) 

هن شيخ اياز جا سموار غزل ترتيب ڏئي، ”هي روح جزيرو حيرت جو“ عنوان سان ڪتابي صورت ۾ شاھ اڪيڊمي ڪراچيءَ پاران ڇپرايو آهي. ان کان سواءِ نوابشاھ جي شاعرن جي تعارف ۽ ڪلام تي مشتمل ڪتاب ”سپنا ساڳيءَ مند جا“ (وسيم سومري سان گڏ:2003ع)، شيخ اياز پاران لکيل سوانحي خاڪن جي ڪتاب ”ھيرا تہ ڏسو“ کي ترتيب ڏئي 2011ع ۾ ڇپرايو. ڪتاب پڙھڻ کان پوءِ (مضمون) 2020ع، تخليق جي سفر ۾ هلندڙ مان (مختلف مضمون) 2021ع، لفظن جا ريشمي لھجا (سنڌي شاعريءَ جو اڀياس) 2022ع پڻ ڇپيل اٿس.