فطرت، سائنس ۽ سماج

سالَ ۾ سالُ جوڙ ٿيندو ويو، تان جو 18 سال گذري ويا آهن اسان جي پياري ڊاڪٽر محبت ٻرڙي کي. 1997 کان 2015 تائين، انيڪ تبديليون آيون آهن اسان جي زندگين ۾، تبديلي نه آئي آهي ته صرف وڇوڙي ۾. وڇوڙي ۾ واڌ ئي ٿيندي رهي آهي، ڪا کوٽ ناهي ٿي. ڪير ٿو چوي ته وقت مطلق آهي! وقت ته نسبتِي آهي: خوشيءَ ۾ ننڍي ۾ ننڍو ۽ ڏک ۾ تمام وڏو، حياتيءَ هوندي ساٿ جي احساس سوا ۽ حيات پڄاڻا ساڻُ نه هجڻ جِي ڪيفيت ۾. پر، وڇوڙي جي ڏک ۾ اتساهه بڻيون آهن ڊاڪٽر محبت جون اهي تحريرون ۽ ترجما، جيڪي سال در سال ڪتابي روپ ۾ ڇپجي مڃتا ماڻيندا رهيا آهن ۽ پنهنجي اهميت پسائيندا رهيا آهن.

هيءُ ڪتاب ”فطرت، سائنس ۽ سماج“ به اهڙين ئي ملهائتين لکڻين تي مشتمل آهي. ڪي لکڻيون آڳاٽيون آهن 1980 جي ڏهاڪي جون، ته ڪي 1990 جي ورندڙ ورهين ۾ سرجيل. ڪي رف حالت ۾ ئي رهيون، ته ڪي فيئر ٿِي ڇپيون به. هن ڪتابي گلدستي ۾ سينگاريل ليکن جا رنگ ۽ خوشبوئيون الڳ الڳ آهن، پر انهن ۾ سمايل وحدت کي هر سڄاڻ پڙهندڙُ چڱيءَ پر سمجھي سگھندو.

پهرين تحرير ”حياتي ڪهڙن ڪمن ۾ گذريو وڃي؟“ کان آخري تحرير ”سج“ تائين، هر لکڻيءَ ۾ هڪ ڳالهه ٻِي به چِٽي آهي؛ دليل، منطق ۽ انگن اکرن جي. هنن لکڻين جي جيءَ جَڙت وهمَ، سَونسي، جهالت ۽ ڌُڪي بازيءَ کي پُٺتي ڌِڪي ٿي ۽ سچ، حق ۽ ڄاڻ سڄاڻ کي اڳتي آڻي ٿي. اسان کي اهڙين لکڻين جي ئي ته هر دَور ۾ ضرورت رهي آهي. پڪ اٿم، ته هيءُ منفرد لکڻين جو ڳُٽڪو اوهان کي ضرور پسند ايندو.

مهرباني.

رياضت ٻرڙو

21 مارچ 2015، لاڙڪاڻو