مخلص انسان: مسرت ابڙو
هـونـدا سـي حـيـات جيئڻ اڳي جي جيـا
سنڌ ڌرتيءَ تي جنم وٺندڙ ان عظيم انسان بابت جيترو لکجي اهو گهٽ هوندو. اهڙا عظيم انسان دنيا ۾ گهٽ پيدا ٿيندا آهن جيڪي پنهنجي محبتن جي سونهن ۽ سوڀيا سان هن سنسار کي مهڪائي ڇڏيندا آهن ۽ پنهنجي هجڻ جو ثبوت هن دنيا ۾ سرهاڻ ۽ خوشبو جي صورت ۾ ڏيندا آهن. هو نه صرف ”مهان“ آرٽسٽ هيو، پر قدرت جو تخليق ڪيل محبتن جي مٽيءَ مان ٺهيل هڪ مجسمو هو، هن جي مَنَ ۾ قدرت جا اهي سڀ رنگ سمايل هئا جيڪي هڪ عام ماڻهوءَ کي عظيم انسان بڻائيندا آهن الله جي زمين تي محبتن جا گل وکيرڻ وارو هي عظيم انسان ۽ قدرت جو حسين شاهڪار هن فاني دنيا مان اسان کان ائين وڇڙي ويو جيئن گلاب جو گل وقت کان اڳ ڪنهن خزان جي موسم جي ور چڙهي ويو هجي. نه چاهيندي به اسان کان هميشه لاءِ جدائيءَ جا گهاءَ، اسان جي دلين تي لڳائي پنهنجون حسين يادون ۽ محبتون اسان لاءِ امر بڻائي ويو هجي.
هو تخليقي سوچ رکندڙ ۽ محبتن کي ورهائڻ وارو انسان جسماني طور ته اسان کان جدا ٿي ويو پر سندس محبتون ۽ مسڪراهٽون اسين ڪڏهن به نه وساري سگهنداسين ۽ هميشه اسان جي دلين ۾ زنده رهندو.
اڄ نــــه اوطـــاقــــن ۾ طـــالــــب تــنـــــواريــــن
آديـسـي اٿــي ويــا مــڙهـيــون مــون مــاريـــن
جي جيءَ کي جيارين سي لاهوتي لڏي ويا