قربانيءَ جو فلسفو
دوست ڪُهائي دادلا، محب مارائي،
خاصن خليلن کي سختيون سهائي،
الله الصَّمد بي نياز، سا ڪري جا چاهي،
انهيءَ منجهه آهي، ڪا اونهي ڳالهه اسرار جي،
اڄوڪو ڏينهن اسان مسلمانن واسطي هن عهد جي تجديد لاِ به آهي ته:
قُلْ اِنَّ صَلَاتِيْ وَنُسُكِيْ وَمَحْيَايَ وَمَمَاتِيْ لِلّٰهِ رَبِّ الْعٰلَمِيْنَ ١٦٢(الانعام)
(تون) چئه ته منهنجي نماز، ۽ منهنجي قرباني، ۽ منهنجو جيئڻ ۽ مرڻ صرف الله لاءِ آهي.
قرباني هڪ اهم ۽ قديم ترين رسم آهي، جو دنيا جي سڀني مذهبن ۾ عمَلا تعليم ڪئي وئي آهي، مسلمانن لاءِ قرباني رضائي الاهيءَ جو عالمگير مظاهرو آهي، جنهن جو مطلب صرف اطاعت ربِّي کان سواءِ ڪجهه به نه آهي. تنهن ڪري پنهنجي حلال ڪمائيءَ مان ان جو اهتمام ڪيو وڃي، ڇاڪاڻ ته الله تعالى پاڻ به پاڪ آهي ۽ پاڪ شيون پسند فرمائي ٿو، ۽ پاڻ حسين آهي ۽ حسين شيون پسند فرمائي ٿو.