اداري پاران

سويت يونين جي زوال کانپوءِ خاص ڪري سنڌ ۾ سياسي پارٽين وٽ معيار کان وڌيڪ مقدار تي زور ڏيڻ سبب سنڌ م فڪري بحث مباحثا ناپيد ٿي رهيا آهن. اهو ئي سبب آهي جو سياسي پارٽيون، خود معياري ليڊرشپ جي بحران مان گذري رهيون آهن. جدليات مطابق جھڙو مواد هوندو آهي صورت به اهڙي ٺهندي آهي. سياسي پارٽين جي موجوده ورڪرن جي سياسي بصيرت مان ڀليءَ ڀت اندازو ڪري سگهجي ٿو ته سياسي پارٽين جي شڪل صورت ڪهڙي هوندي. ان فڪري بحران کي سامهون رکندي سرسوتي ساهت گهر پاران اهو فيصلو ڪيوسين ته ڇو نه ان رجحان کي هٿي وٺرائڻ لاءِ هڪ دفعو ٻيهر پيش قدمي ڪجي. ان ڏس ۾ سنڌ جي گهڻ طرفي پڙهيل لکيل دانشور ڊاڪٽر مير عالم مري کي گذارش ڪئي سين، جنهن سياسي ڪارڪنن جي تربيت جي حوالي سان ڪجهه اڳ ۾ لکيل ۽ ڪجهه نئين سر سان ڪم هٿ ۾ کڻي اداري جي حوالي ڪرڻ جي هامي ڀري آهي.
هي سياسي تربيتي نصاب في الحال ”نيشنلزم، سيڪيولرزم ۽ جمھوريت“ جي سمجهاڻي طور تي ڏنل آهي، ان کان بعد ۾ مختلف تربيتي نصاب جا سبق، سوال- جواب ۽ ٻيو جيڪو مواد ضروري سمجهيو ويو ان کي پڻ جلد کان جلد شايع ڪرائي، پنهنجي فرض جي ادائگي ڪنداسين. هن ڪتاب جي مواد ڏيڻ جي سلسلي ۾ اسان اداري پاران ڊاڪٽر مير عالم مري جو شڪريو ادا ڪريون ٿا جنهن اسان کي مثبت موٽ ڏئي، حوصلو بخشيو آهي. ڪتاب شايع ڪرائڻ جي مد ۾ قومپرست اڳواڻ محترم امير”آزاد“ پنهور ۽ محترم منور بليديءَ جا پڻ ٿورائتا آهيون، جن هڙان وڙان ڏئي اداري جي مالي سهائتا ڪرڻ ۾ پنهنجو ڪردار ادا ڪيو.
اسان کي اميد اهي ته اسان جي محبت ۾ محنت اوهان کي قبول پوندي.

ادارو
سرسوَتي ساهت گهر- ڏوڪري
ضلعو لاڙڪاڻو.
تاريخ: 2012-12-21

تاريخ، فلسفو ۽ سياست

سياسي تعليمي نصاب (قومپرستي، سيڪيولرزم ۽ جمهوريت)