ڏوتڙ
پاريننگر کان ڪجهه فاصلي تي هاڪڙي جي ڇوڙ وٽ سانگاه جي تلاءَ وٽ هڪ بندرگاه جا آثار موجود آهن ، جن کي ڏوتڙ سڏيو وڃي ٿو. اصل ۾ اهي آثار به پاريننگر سان لاڳاپيل آهن. هتي هاڪڙي جي مٺي پاڻي تي بندر يا پتڻ موجود هو، جنهن تي دريائي واپاري پنهنجو سامان آڻيندا هئا، ۽ پوءِ اهو سامان سامونڊي کاري تي ٺهيل بندر ذريعي سامونڊي غورابن ۾ ڏيساور جي ملڪن ڏانهن ويندو هو. انهي ٻه طرفي واپار ذريعي هي شهر ماضي جو وڏو ۽ خوشحال شهر هو. هتي هندو ۽ جين ڌرم کان سواءِ پارسي مذهب وارن جي عبادتگاهن جا به آثار ملن ٿا. جنهن سان هن شهر جي بين الاقوامي اهميت جو پتو پوي ٿو. هتي جين ڌرم جو هڪ قديم مندر موجود آهي. هن ماڳ کي به سرسوتي تهذيب جي جين مت مڃيندڙ ماڻهن جي مرڪزي شهر پاريننگر جي هڪ حصي طور ڳڻي سگهجي ٿو.