حضرت مخدوم صدر شاھ عثمان قريشي سُهروردي جي شان ۾ مخدوم زاده حضرت سائين ميان عبدالرزاق پيرزاده جي چيل مناجات
احد لاشريڪ له بي مثال - که ذاتش مُنزِه زنقص زوال
محابي محمد نبي مصطفى - ٿيس شان معراج وارو عطا
مداحي جنهنجو ٿيو خود خدا - بفرمود لولاڪ رب العلى
محابي ابوبڪر عالي وقار - سچو دوست حضرت سندو يارغار
ڪيو مال قربان ڀيرا هزار - فدا پاڻ مرسل مٿان باربار
محابي عمر مير ابن الخطاب - هر معامله لاءِ جنهن برصواب
عدالت جو ڌاڪو ٻڌي بي حجاب - گهمي گرگ ڌڻ سان نه ڏي ڪنهن عذاب
محابي سخي مرد عثمان جو - بحر علم جو ابن عفان جو
ڪيو جوڙ آيات قرآن جو - گهڻو ٿيو مٿس راز رحمان جو
محابي علي شاھ شيرِ خدا - پيارو پيغمبر سندو مرتضى
ولايت جو والي هيو با صفا - کفارن جو قاتل ولي مصطفى
محابي جگر گوش نورالہدى - جنهن جو هيو زوجِ شيرِ خدا
ڀلاري هئي خاص خيرالنساء - عبادت اندر محو شب و روز زيبا
محابي حسن جان خيرالورى - پسر شاھ مولى علي مرتضى
سخاوت جو هو ڪو پيو جابجا - امامت شهادت ٿيس پڻ عطا
محابي جنگي مرد شاھ ڪربلا - سٺي سر اتي لاءِ امت بلا
پيالو شهادت ڀري برملا - رسيو بحر رحمت م بلغ العلى
محابي ٻنهين خاص عمين جي - شفيع الامم شاھ ڪونين جي
پيارن ڀلارن شريفن جي - سڳورن صحابن اميرن جي
محابي صحابن مرسل مٺو - جنهن روبرو مير مدني ڏٺو
مٿن نور رحمت اٺو ئي اُٺو - وتي ويري تن جو مٺو ئي مٺو
محابي قطب غوث اعظم منير - ولايت جو والي به تنهن درفقير
شهنشاھ پيرانِ روشن ضمير - رسي بحر بر ۾ هڪل ساڻ وير
محابي قطب غوث ملتان جو - حقيقت ۾ حاڪم هندستان جو
وٺي دست هندؤ مسلمان جو - اوهان کي ڏنو علم عرفان جو
اڳئون غوث ملتان منصور تون - نظر مصطفى ۾ منظور تون
ٿئين معرفت ساڻ مغفور تون - تون ئي سرسبحان جو نور تون
اوهان جو لقب شاھ مخدوم ٿيو - اندر لوح محفوظ مرقوم ٿيو
مٿي عرش ۽ فرش معلوم ٿيو - ته “مخدوم عثمان” معصوم ٿيو
قريشي نسب هاشمي آھ تو - فراشن ۾ مشهور درگاھ تو
سلامي سڄي سنڌڙي آھ تو - حڪم حيدري جابجا آھ تو
اوهان کي عطا آھ ڪئي ذوالجلال - ڪرم سان ڪرامت ولايت بحال
پسايو پرين حسن پنهنجو جمال - ڪرايو شادآباد دل پُر ملال
ڀري بار بيحد گناهن سندو - کڻي سر مٿي ٿو وتان ٿڙڪندو
نه ڄاڻان ته مون سان خدا ڇا ڪندو - نظر مهر جيءَ سان بندو مرڪندو
ڏسي ڏوھ پنهنجو اچي لڄ پئي - ڪريان هاڻ ڪيئن ڇڻي ٿي ڇڻي
انهن جي اڳيان ڇا ٻڌايان چئي - جت پڇاڻو ڪندا ملائڪ ٻئي
نه طاعت ڪئي مان کڻي جا هلان - اڳيان ڀيڙ ڀڪوڙ ٻي ڀل ڀلان
وڇون نانگ بيحد ٻجهن الڇلان - دلاسو ڏيارو ته کلندو هلان
سگ در گهت طوق سرے گردنم - مدد ڪُن چوجانِم رَوَدِاَزِ تنم
بگويم شهادت و زين جا روم - که من عبدالرزاق عاجز تنم
[b]لاالہ الا الله محمد رسول الله صلي الله عليہ وسلم
وآخر دعوانا ان الحمد لله رب العالمين[/b]