سکر جو سئر
ڏسو هي سهڻو شهر سکر
کرڙيءَ جو ميدان هتي
سنڌوءَ جو وڏو شان هتي
تفريح سان گڏُ ڄاڻَ ڀريو
آهي سجايو هيءُ سفر
ڏسو هي سهڻو شهر سکر
معصوم شاهه جو هي آ منارو
ان تان ٿئي ٿو خوب نظارو
ماضيءَ هو هي منظر پيارو
پري کان ايندو آهي نظر
ڏسو هي سهڻو شهر سکر
آدم شاهه جي ٽڪريءَ چڙهبو
ساڌ ـ ٻيلي ٻيڙيءَ تي هلبو
پُل جي پريان هلي ڏسبو
وچ درياهه ۾ ٻيٽُ بکر
ڏسو هي سهڻو شهر سکر
سج لهڻ تي آهي هاڻ
گھمڻ هلون ٿا لب مهراڻ
بئراج کان موٽي ڏسنداسين
وچ شهر ۾ گھنٽا گھَرُ
ڏسو هي سهڻو شهر سکر.