عالم خان
ڏسو هي ٻارو عالم خان
ماڻهو هن کي بيهي ڏسن ٿا
ننڍڙا ٻالڪ ڊڄي وڃن ٿا
ڏسي قداور هستيءَ کي
لوڪ سڄو آهي حيران
ڏسو هي ٻارو عالم خان.
سوڙهي گھر ۾ وڃي نه سگھندو
عام کٽن تي سُمهي نه سگھندو
موٽر ڪار ۾ گھُمي نه سگھندو
جتي به عالم خان وڃي ٿو
ملي ٿو هن کي ڏاڍو مانُ
ڏسو هي ٻارو عالم خان.
سورهن والن جي سُٿڻ پائي
ڏهه مانيون ويلي تي کائي
ماڻهن سان ويهي ڳالهائي
ملڪن ۾ مشهور ويو ٿي،
آهي اسان جو مُڙس مهان
ڏسو هي ٻارو عالم خان.