4.18 سياست
چڪلو گھمندي ڦرندي کيس حيراني ٿي ته هر طرف بازار ۾ ويراني ڇانيل هئي. نه فضا ۾ اُهي سُر هيا، نه تال ، نه پائل جي اُها جھنڪار هئي، نه تماشبينن ۾ اُها ڏيڻ وٺڻ جي تميز هئي. ائين لڳي رهيو هيو، ڄڻ هڪ عجيب قسم جي بدتميزي جو طوفان هيو. نظرن ئي نظرن ۾ ڄڻ طوائفون ۽ تماشبين هڪ ٻئي کي کائي رهيا هيا.
هِن هڪ غمزده پوڙهي ڪڃر کي ڏٺو. جيڪو هڪ ڪوٺي جي آخري ڏاڪڻ ڏاڪي تي، ڪنڌ هيٺ ڪيون، ڪچو شراب واپرائي رهيو هيو. هن وڌي وڃي ڪڃر کان پڇيو: ‘ڇا ٿي ويو آهي چڪلي کي ....؟ ڪنهن جي نظر لڳي ...؟ جو ائين هر شئي بي رونق ٿي وئي آهي!’
پوڙهي ڪڃر ڪنڌ مٿي ڪري، ٿڌو ساهه ڀريندي جواب ڏنو:
‘بائوجي ....! جڏهن کان چڪلي ۾ سياست آئي ته چڪلو تباهه ٿي ويو.’
*