شاعري

جڏهن هُو زلفَ ڇوڙي ٿو

هي شاعريءَ جو ڪتاب ”جڏهن هو زلف ڇوڙي ٿو“ خوبصورت شاعر احساس ميرل سهتي جي شاعريءَ تي مشتمل آهي. هي ڪتاب امرتا پبليڪيشن حيدرآباد پاران 2016ع ۾ ڇپايو ويو آهي.
هُن جي شاعري جتي سماج ۽ سماجي حالتن جي اُپٽار ڪندي نظر اچي ٿي، اُتي هُو پنهنجي داخلي خيالن کي به اظهاري ٿو، جن ۾ اظهارِ محبت به آهي ته اظهارِ غم و رنج به آهي، جدائي به آهي ته وفائي به آهي ۽ بيوفائي به آهي. هُو عاشق مزاج شاعر آهي يا شاعر مزاج عاشق ان بابت پاڻ کي ڪا خبر ڪانهي پر هُن جي شاعري عشق جهڙي مشغلي سان مُشڪبار آهي
Title Cover of book جڏهن هُو زلفَ ڇوڙي ٿو

• انصاف

مون ڏاڍو ڳوليو ڪونه لڌو
انصاف الائي ڪاڏي ويو..!!

ڪٿ محلن ۾ ها رنگ نوان
۽ ڍونگين جا ها ڍنگ نوان
ڇا دسترخوانا دنگ نوان
۽ محفل، سُرَندا، چنگ نوان
پر جھانگيئڙن جي جھوپن ۾
معصوم جي رڙين رنگ ڪيا
پئي کير ڦُڙي لئه خوب رُنو
ڪو بيوس هڪڙي مانيءَ لئه
ٿي اُٿليو پُٿليو رات سڄي
پوءِ بُک ڏني اهڙي ننڊ جو
هُو ڪونه اُٿيو، پوءِ ڪونه اُٿيو
مون ڏاڍو ڳوليو ڪونه لڌو
انصاف الائي ڪاڏي ويو..!!

ڏس ٿر آ ڪارو سون سڄو
ڇا سونهارا بُک مرندا هِن..!؟
جنهن گھر ۾ سون جو ڍِڳ هجي
پر هُن کي هڪڙي ويلي جي
ماني به ملي ٿي مشڪل سان
هُو پنهنجي پيٽ جي باھ کڻي
هِي ديس ڇڏي سڀ ويس ڇڏي

پيو ٺوڪر کائي دَر دَر جي
اڄ ملڪ لٽيرن کان ڪو پُڇي
جنهن گھر ۾ سون جي کاڻ هجي
سو فاقه ڪشيءَ ۾ ڏينهن ڪَٽي
مون ٿر جي واري جانچي آ
تنهن واريءَ ۾ هو درد وڏو
مون ڏاڍو ڳوليو ڪونه لڌو
انصاف الائي ڪاڏي ويو..!!

*