شاعري

سرور

مسرور پيرزادي جي شاعريءَ ۾ ٻوليءَ جي سادگي، لفظن جي چونڊ ۽ عنوان، شاعريءَ جا خيال سچ تہ دلچسپ ۽ وڻندڙ آهن.  مسرور دلرباين، دلڪشين ۽ حسناڪين جو شاعر آهي. مسرور سونھن، سندرتا، سچ، محبت ۽ ڪائنات جي حسناڪين سان پيار ڪندڙ شاعر آهي. مسرور سنڌي غزل کي اوج ڏنو ڏنو آھي. سندس نظم پڻ منفرد آھن.

Title Cover of book Suroor

ڊڄان پيو تہ ڪٿي ھن کي مون سان پيار نہ ٿئي

ڊڄان پيو تہ ڪٿي ھن کي مون سان پيار نہ ٿئي،
اجايو ھوءَ محبّت ۾ سوڳوار نہ ٿئي!

عجيب آھہ ۽ مشڪل منھنجي تمنا ھيءَ،
ڪجي ڪو عشق مگر جيءُ بيقرار نہ ٿئي!

اسان جو پيار اسان جي ھجي ڪا آزادي،
اسان جو پيار اسان لاءِ پرين! ڄار نہ ٿئي!

گذاريو جو ھيو دور تنھنجي دوريءَ ۾،
چوان ٿو مان تہ اھو عمر ۾ شمار نہ ٿئي!

پکيءَ پيار منجهان جنھن تي اڻيو آکيرو،
دعا ڪيان ٿو اھو ڌار وڻ کان ڏار نہ ٿئي!

جهان جوڙجي اھڙو جدوجھد سان، جو،
خدا جي سامھون بندو ڪو شرمسار نہ ٿئي!