جيل ڊائري

ڪايا مَنجَهه ڪَڙَن

” ڪَايا مَنجهه ڪَڙن “ محترم علي محمد شاهه لڪياري جي جيل ڊائري آهي. هن جيل ڊائريءَ ۾ 1980ع جي ڏهاڪي واري دور جي سنڌ يونيورسٽي ڄامشورو ۾ قوم پرست شاگرد سياست ۾ علي محمد شاهه جي شاگردي واري زماني ۾ هم آهنگي ۽ اُن سياست جي سفر ۾ آيل ڀوڳنائن ۾ جيل ياترا جو دور ۽ قيد وبند جون يادگيريون تحرير ٿيل آهن.
Title Cover of book ڪايا مَنجَهه ڪَڙَن

اداري پاران

مون ڪٿ پڙهيو هو ته هر ماڻهوءَ کي پنهنجي روز مره جي زندگيءَ جي يادن کي لفظن جو روپ ڏئي، تحرير ڪرڻ گهرجي، ڇاڪاڻ جو هر ماڻهوءَ جي زندگي، وقت جي لا سرحد اتهاس جو هڪ اهڙو حصو آهي، جنهن جي اکر اکر تحرير سان هر دور جي ماڻهو جي حياتي جي آرسي جُڙي ٿي، جنهن ۾ تاريخ جا عڪس پسي ۽ پروڙي سگهجن ٿا. اهڙيءَ طرح سان روز مره جي جياپن جي يادن تي مشتمل ڊائري يا تحرير انساني زندگيءَ لاءِ ڀرپور تجربن، مشاهدن جو درس بڻجي سندن لاءِ مشعلِ راهه بڻجي سگهي ٿي ۽ خود اُن ماڻهوءَ لاءِ به ماضيءَ جي جهروڪي ۾ جهاتي هڻي زندگيءَ جي مثبت راهن کي هموار ڪرڻ جو ذريعو ٿي پوي ٿو.
سِپَ پبليڪيشن جا هيل تائين جيڪي به ڪجهه ڪتاب ڇپيا آهن، اُهي شاعريءَ تي مبني آهن. اُن ڪري نثر جي ڪنهن ڪتاب کي شروعات ڪرڻ لاءِ اسان هيل اڄ جي اجرڪ جي پَٽڪي واري صحافي ۽ ڪالهوڪي آزاديءَ جي پانڌيئڙي علي محمد شاهه لڪياري جي جيل ڊائري ”ڪَايا مَنجهه ڪَڙن“ پڙهندڙن کي پيش ڪري رهيا آهيون. هن جيل ڊائري ۾ 1980ع جي ڏهاڪي واري دور جي سنڌ يونيورسٽي ڄامشورو ۾ قوم پرست شاگرد سياست ۾ علي محمد شاهه جي شاگردي واري زماني ۾ هم آهنگي ۽ اُن سياست جي سفر ۾ آيل ڀوڳنائن ۾ جيل ياترا جو دور ۽ قيد وبند جون يادگيريون تحرير ٿيل آهن. سِپَ پبليڪيشن هن لڳ ڀڳ ٽي ڏهاڪا اڳ جي دور جي تاريخ کي وقت جي دز ۾ لٽجي وڃڻ کان محفوظ ڪندي ڪتابي صورت ۾ ڇپائي اوهان کي آڇيندي سرهائي محسوس ڪري ٿي.