ڪامريڊ صوف
اهڙو کهرو جواب ٻڌي ماڻس کي اکين مان لڙڪ لڙي پيا. اهي ڏينهن ياد آيس جڏهن شاهه گودڙيءَ جي درگاهه ۾ وارن سان ٻهاري ڏني هئائين ۽ فقير کيس دعا جو صوف ڏنو هو جنهن کي کائڻ کان پوءِ جلد ئي سندس وڏي ڀاءُ يعني صوف جي مامي ڪن ۾ وڏي واڪي ٻانگ ڏيئي سندس نالو صوف پٽ ڏاڙهون رکيو هو.
حنيفت، صوف جي ماميءَ، جنهن پريان ٿانوَ ويٺي ڌوتا تنهن رڙ ڪري چيس ته، ”ابا چار رپيا ڏيئي پڻهين جو نالو به بدلائي ڇڏ!“ صوف ڪاوڙ مان کيس گهوريندي پنهنجو ٽڪنڊو منهن ڦيرائي ڇڏيو.