106. ڪتي جو ڪارو منھن، رٻ اوتري جي اوتري
بنياد:
هڪڙي غريب رٻ جو ڪنو رنڌي رکيو، تنھن ۾ ڪتي اچي ٻوٿ وڌو. پر رٻ کائڻ کان اڳي، مالڪ هڪلي ڇڏيو. ڏٺائين جو ڪتي رٻ ڪا نه کاڌي، رڳو ڪنو نوسيائين ۽ ڪني جي ڪارنھن، منھن کي لڳيس. تڏهن ڪني جي ڌڻيءَ کلي هي پھاڪو چيو.
مطلب پھاڪي جو هيءُ آهي جو ٻن يارن جي وچ ۾ هڪڙو ڇيڻا-ڀور پئجي هڪڙي جي ٻئي وٽ گلا ڪري ڏڦيڙ وجهي، پر جڏهن هو ٻئي ڄڻا پاڻ ۾ ڳالھيون ڪري ٻڌي لائيءَ چائيءَ واري جي ڳالهه کي گڏهه جي هينگ جھڙو ڄاڻي پاڻ ۾ کير کنڊ ٿين، تڏهن ان ٻچاپڙي جي واسطي هي پھاڪو چوڻ ۾ اچي. (گلشڪر)