سنڌسلامت پاران
سنڌ سلامت ڊجيٽل بوڪ ايڊيشن سلسلي جو نئون ڪتاب ”سنڌ منھنجي جِند“ اوهان اڳيان حاضر آهي. ھي ڪتاب نامياري ليکڪ، شاعر ۽ پبلشر مور ساگر جو سنڌ وطن جو لِکيل سُھڻو سفرنامو آھي. سنڌ وطن جي سفر جي سلسلي جو هي ڀاڱو ٽيون آهي جنھن جي مھاڳ ۾ ناميارو ليکڪ، شاعر نصير مرزا لکي ٿو تہ:
”اسان جي مور ساگر، سنڌ جي سئر سياحت بابت ھيءَ تہ صفا ڪا نئين طرح ايجاد ڪئي ٿي ڏِسجي ۽ ان ڪم لاءِ زندگيءَ جي ڪاروھنوار مان ڪي ڏھاڙا پاڇي ڪري، ھو يارن سان سنگ سنگ، کُليل اکين ۾ ڪئميرا ۽ بئگ ۾ قلم ڪاڳر رکي، سيلاني بڻجي نِڪري ٿو پوي ۽ رات وقت پوءِ سارا پنھنجا مشاھدا، منظر ۽ يارن جون دِلچسپ ڳالھيون، ڪنھن گوشي ۾ ويھي چپ چاپ لِکي ٿو وڃي ۽ پوءِ جيئن ڦُڙي ڦُڙي تلاءُ ٿيندو آھي، ھو ھھڙا ڪتاب ٿو جوڙي وٺي.“
هي ڪتاب ساحل پبلڪيشن پاران پھرين جنوري 2223 ع تي ساحل پرنٽرز، حيدرآباد وٽان ڇپايو ويو آھي. ٿورائتا آهيون مور ساگر جا، جنھن ڪتاب جي ڪمپوز ڪاپي موڪلي ۽ سنڌ سلامت ڪتاب گهر ۾ پيش ڪرڻ جي اجازت ڏني.
محمد سليمان وساڻ
مينيجنگ ايڊيٽر (اعزازي)
سنڌ سلامت ڊاٽ ڪام
sulemanwassan@gmail.com
www.sindhsalamat.com
books.sindhsalamat.com