پنھنجي ٻولي سان پيار ڪندڙ پيارو ماڻھو ڊاڪٽر مظھر علي ڏوتيو
پاڻ سُٺا استاد ۽ سنڌي ٻوليءَ لاءِ جاکوڙيندڙ ڪمپيوٽيشنل لنگئسٽ آهن. ان ڪري کين ٻولي سان پيار بہ بي پناھہ آهي. هن شخص جو شمار انھن تمام ٿورن ماڻھن ۾ ٿئي ٿو، جيڪي سنڌي ٻولي کي ڪمپيوٽر جي ٻولي بڻائڻ ۽ ٻولي جي بچاء ۽ واڌاري لاءِ جديد تقاضائن موجب ڪم ڪري رهيا آهن. مون، کين پنھنجي ٻولي بابت فڪرمند ۽ سنجيدہ ڏٺو آهي. سنڌ کي هن وقت هر شعبي ۾ اهڙن ٽيڪنيڪل ماڻھن جي سخت ضرورت آهي، جيڪي پنھنجي پنھنجي شعبن ۾ جديد طرز تي ڪم ڪري سنڌ جو نالو روشن ڪن. ڇو تہ اها ايڪيھين صدي جي ضرورت آهي. هاڻي اجاين لفاظين ۽ حوالن جو وقت ناهي. هي وقت سخت محنت ۽ سچائي جو آهي.
سو، سائين مظھر صاحب ڪمپيوٽر جي دنيا جو ماڻھو آهي. هُو ڳالھين بجاءِ عملي ڪم کي اهميت ڏئي ٿو. هُن جون سنڌي ٻولي بابت جديد دؤر جي تقاضا موجب صلاحون ۽ عملي سرگرميون نھايت ئي ڪارائتيون آهن. ان حوالي سان سندن هڪ يوٽيوب تي چئنل بہ آهي. جنھن تي پاڻ وقت بوقت ٻولي سان لاڳاپيل وڊيوز اپلوڊ ڪندا رهندا آهن. اها بہ پنھنجي ٻولي جي عملي طور تي هڪ خدمت آهي.
منھنجو ساڻن فيس بڪ ذريعي ئي رابطو ٿيو. جتي منھنجي ڪتاب بابت پوسٽ ڏسي، منھنجو ڪتاب خريد ڪيو هئائون ۽ ڪتاب پڙهي پوءِ مون کي ميسيج ۾ پنھنجو قيمتي رايو بہ موڪليو هئن.
ڪجهہ ڏينھن اڳ سندن ڪتاب عالمگيريت ۽ سنڌي سماج بہ شايع ٿيو. جيڪو پنھنجي نالي ۽ موضوع مان ئي لڳي ٿو تہ هڪ شاندار ڪتاب آهي. ان کان سواءِ، مختلف رسالن ۾ بہ مستقل بنيادن تي ڪارائتا ليک لکندا رهندا آهن. انھن لکڻين مان بہ سندن حساس مزاج جو ڀرپور احساس ٿيندو آهي.
(06 مارچ 2020ع)