ڪي مُرليون وڄايون
اچو يار گڏجي غزل بيت ڳايون،
کڻي ساز سُرندا ڪي مرليون وڄايون.
اڃان سوجهرو آ، اڃان چنڊ آهي،
اڃان رات اوندهه مٿان منڊ آهي.
اچو مير مجلس هي محفل مچايون.
اڃان ساهه آهي، اڃان ست آهي،
اڃان هن رڳن ۾ رهيل رت آهي.
اچو پنهنجو آواز پلپل پڄايون.
اڃان پنهنجي اوطاق ۾ مچ آهي،
اها هي ڪهاڻي ٻڌو ڳچ آهي.
اچو رنگ لايون ڪچهريون سجايون.
اڃان ڳائجي هت ڪنور ۽ اياز،
اڃان ڳائجي هت گدائي، نياز.
اچو ڳايون ’ارڏا‘• ڀٽائيءَ جون وايون.