مختلف موضوع

ڪفايت شعاري

سنڌ يونيورسٽي جي 1957ع جي دور ۾ رهندڙ رجسٽرار خانصاحب آغا تاج محمد خان جو لکيل ڪتاب ”ڪفايت شعاري“ 1957ع ۾ آر ايڇ ۽ برادرز پاران ڇپايو ويو. ڪفايت شعاري جي اڄ به ساڳي ئي اهميت آهي جيڪا ان دور ۾ هئي.
Title Cover of book ڪفايت شعاري

• ڪفايت شعاريءَ جي رستي ۾ ڪي رڪاوٽون

جھڙي طرح اسراف (فضول خرچي) ڪفايت شعاريءَ جي رستي ۾ ھڪ وڏي رڪاوٽ آھي ته اھڙي طرح اڌاري چيز خريد ڪرڻ به وڏي رڪاوٽ آھي. ڇو ته ان ۾ خبر نه پوندي آھي ته ته گھرج کان وڌيڪ سامان خريد ڪيو ويو آھي يا پورو. پر پڪ آھي ته وڌيڪ سامان خريد ڪيو ويو ھوندو. ٻيو اوڌر تي مليل چيز سٺي به نه ملندي، پر ان جي قيمت ھوندي ته سٺي چيز کان وڌيڪ نه ته به ان جيتري به ضرور ھوندي. اڌاري سامان وٺڻ مان ھي به نقصان آھي، جو آمدنيءَ کان به وڌيڪ خرچ ڪبو ته به خبر ڪانه پوندي. جيڪڏھن ٿورا ڏينھن اھا عادت پاڻ ۾ وجھبي ته پوءِ غير ضروري خرچ ڪرڻ تي به انسان جھٽ پٽ مائل ٿي ويندو. تنھنڪري ضروري آھي ته پاڻ کي اڌاري سامان خريدڪرڻ کان روڪجي. انھيءَ عادت کان پاڻ کي روڪڻ لاءِ زور انھيءَ ڪري به رکجي ٿو، جڏھن گھڻو وقت اھا عادت ھوندي ته يقيني امر آھي ته بقايا به دڪاندار جي ضرور رھندي ايندي. پوءِ پاڻ کي ڄڻ ته ان حساب دار يا دڪاندار جي وس ٿيڻو پوندو. پوءِ ان تي ڪوبه زور ھلي نه سگھندو، جيڪڏھن ھو ارزان ۽ خراب شيون ڏئي قيمت وڌيڪ رکندو ته به انسان اھڙين شين جي قبول ڪرڻ لاءِ لاچار ۽ مجبور ٿو رھي. اھا حالت تمام نقصان ڪار آھي، تنھن ڪري ان کان بچڻ ضروري آھي.