سرور ڪائنات جي خدمت ۾ نعتون
دُعا جو هي اثر ٿيو جو حضرت حسان فى البديه سائين ڪريمن جي تعريف ۾ هڪ جامع قصيدو چيائين، انهيءَ قصيدہ جا پھريان ٻہ بيت تبرڪاً هت لکجن ٿا:
هَجُوۡ تُ مُحَمَّدًا فَاَجِبۡتُ عَنۡہُ
وَعِنۡدَ اللهِ فِيۡ ذَاکَ الۡجَزَا ءٌ
ترجمه: توهان سرورِ ڪائنات جي بي ادبي ڪئي آهي ۽ مون انهن جي طرفان جواب ڏنو آهي ۽ الله تعالىٰ وٽ ان جو فيصلو ٿيندو.
فَاِنَّ اَبِىۡ وَ وَالِدَتِىۡ وَ عِرۡضِىۡ
لِعِرۡضِ مُحَمَّدٍ مِنۡکۡمۡ وِقَاءٌ
ترجمه: پوءِ بيشڪ منهنجو پيءُ ۽ ماءُ ۽ منهنجي عزت سائين ڪريمن جي عزت ۽ شان تان قربان آهن.
(۲) سرورِ ڪائنات صلى الله عليه وآلهٖ وسلم جن جڏهن هجرت ڪري حضرت ابوبڪر صديق رضى الله عنه سان گڏ مدينه منورہ پھتا تہ مدينه طيبه جي ماڻهن سائين ڪريمن جو استقبال هنن بيتن سان ڪيو، اهي اشعار سائين ڪريمن پسند فرمايا. انهن استقباليه شعرن مان فقط ٻہ شعر تبرڪاً پيش ڪجن ٿا:
طَلَعَ الْبَدْرُ عَلَیْنَا † مِنْ سَنِیَّاتِ الْوِدَاعٖ
وَجَبَتْ شُکْرُ عَلَیْنَا † مَا دَعیٰ لِلّٰہِ دَاعٖ
(۳) حَضرت شيخ سعدي رحمة الله عليه جن جڏهن نبي ڪريم صلى الله عليہ وآلهٖ وسلم جن جي تعريف ۾ هي نعت ٿي چئي:
بَلَغَ الْعُلےٰ بِکَمَالہٖ
کَشَفَ الدُّجےٰ بِجَمَالہٖ
حَسُنَتْ جَمِیعُ خِصَالهٖ
تہ کين انهيءَ نعت جي آخري سٽ ڪانہ ٿي آئي، تڏهن نبي ڪريم صلى اللھ عليه وآلهٖ جن شيخ سعدي رحمة اللھ عليه کي خواب ۾ آيا ۽ فرمايائونس تہ انهي نعت جي آخري سٽ هن طرح لک:
صَلُّوْا عَلَیْہِ وَآلِہٖ
انهي مان معلوم ٿيو تہ سائين ڪريم جن پاڻ نعت ٺاهيندڙن جي رهنمائي فرمائن ٿا.
سرورِ ڪائنات صلى اللھ عليه وآلهٖ جي دربار اقدس ۾ سڀني شاعرن مختلف ٻولين ۾ پنهنجي شان ۽ معيار مطابق نعتون، مداحون، مولود ۽ قصيدا پيش ڪيا. انهن شاعرن ۽ مداحن جي صف ۾ هڪ عظيم شاعر حضرت امام شرف الدين بوصيري رحمة اللھ تعالىٰ عليه آهي، جنهن عربيءَ زبان ۾ سرورڪائنات جي مدح ۾ قصيدہ بردہ شريف چئـِي عالمِ اسلام ۾ هڪ غير معمولي مقبوليت حاصل ڪئي آهي.