اقرار جي منزل ڳوليندي ، انڪار جي ماڳ تي پهتاسين
اعتبار جي ٻيڙين ۾ لُـڙهندي ، اغيار جي ماڳ تي پهتاسين
*****
غيرن جا گھڙيل هئا گھاٽ مگر سازش ۾ صلاحو سڄڻ به هئا
پر صبر سهاري ، ڪين اسان ، تڪرار جي ماڳ تي پهتاسين
*****
رڻ پٽ صحرا جا رند پُڇي ۽ پريم نگر جا پنڌ پڇي
هڪ دل جي دنيا ساڻ ڪري ، دلدار جي ماڳ تي پهتاسين
*****
ڪجهه رات رني، ڪجھه بات رني، ڪجھه جيت رني، ڪجهه مات رني
هڪ ڏينهن جڏهن تون مان گڏجي ، ڪنهن سار جي ماڳ تي پهتاسين
*****
جي پيار ، وفا جا پانڌيئڙا ، سي ڪلفت جي ويجھو نه ويا
جي پيڙائن ، پئي پاند ڀريا ، ته به پيار جي ماڳ تي پهتا سين
*****
ڪجهه سال گذر ٿيا سجدن ۾ ۽ عمر کپي وئي آزين ۾
مس مس ته نقاب هٽيا ۽ مس ، ديدار جي ماڳ تي پهتاسين
*****
هن پيار ڏنو ، پر دل ورتي ، ڪجھه درد ڏنا ، سُک چين وتو
اي ”سيال حيات“ اسان شايد ، وڻجار جي ماڳ تي پهتاسين