ڪا ته اندر ۾ اڻ تڻ ٿئي اک آلي ٿئي
پيار ڪري ڪا ، شايد پيڙا پالي ٿئي
*****
پنهنجو اندر کائڻ ، پنهنجا لڙڪ پيئڻ
نينهن نگر جي ، ريت پريت نرالي ٿئي
*****
محبت ۾ هُو ”مير“ ، فقير آ بنجي ويو
۽ هُو باهه بٺي ۾ بيٺي ، بالي ٿئي
*****
ايٿوپيا جا ، اُن کان وسريا افسانا
جنهن به ڏٺي هن ڌرتي جي بدحالي ٿئي
*****
تيزابن جي تڙپ ، تماشو سمجھي ٿي
سا اک ، سا دل ، احساسن کان خالي ٿئي
*****
جنهن دل سان تون کيڏيو هئين ، اڄ توکان پوءِ
سا دل ڇورن ٻارن جيئن ، اُٻالي ٿئي
*****
دنيا جي درٻارن کان آ ، ڏور گھڻو
سونهن نگر ۾ ”سيال حيات“ سوالي ٿئي