مون ننڊ ڳولي رات ڀر ، تون بي خبر سپنن ۾ گم
هئا نيڻ تولئِه منتظر ، تون بي خبر سپنن ۾ گم
*****
تو لاءِ مون ، تارا تڪيا ، چارا به هئا سارا تڪيا
آخر اکيون ٿي ويون پٿر ، تون بي خبر سپنن ۾ گم
*****
جت روشنيون ۽ رنگ هئا ، جت دلبرن جا دنگ هئا
اُت مان مسافر دربدر ، تون بي خبر سپنن ۾ گم
*****
مان جھنگ جھر توڪاڻ ويس ، ڪاهي ڪُنن ۾ پاڻ پيس
لڙهندو رهيس هرهڪ لهر ، تون بي خبر سپنن ۾ گم
*****
تو پاڻ وٽ سانڍي رکيون ، احساس کان خالي اکيون
ٿي زندگي ڪنهنجي زهر ، تون بي خبر سپنن ۾ گم
*****
مان راهه ۾ رلندو رهيس ، جلندورهيس ، هلندو رهيس
هئا سور مون سان همسفر ، تون بي خبر سپنن ۾ گم
*****
جت سونهن هئي سنسار جي ، برسات تنهجي پيار جي
اُت”سيال“ مان پهتس مگر ، تون بي خبر سپنن ۾ گم