سونهن جا سردار مان ، دربان تنهنجي در ٿيان
چنڊ تون ٿي چوڏهين جو ، مان وري امبر ٿيان
*****
تون رسالو شاهه جو ٿين ها ، پڙهان ها هر گھڙي
هاڻ تون ڪو بيت ٿي ، مان صاف ڪو ڪاڳر ٿيان
*****
ٿي نه تون نوري سگھين ۽ مان تماچي ڪين ٿيس
نينهن جي پوءِ ناوٿي ، مان قرب جي ڪينجھر ٿيان
*****
نيڻ تنهنجا ٿي پوان ، تون هر گھڙي ڇيڙين ڇنڀين
يا ته پائين پيار مان ، ڪو قيمتي زيور ٿيان
*****
خون ٿي منهنجي رڳن ۾، جي نه آن رلجي سگھيو
مئهِ محبت جي ته ٿي ، مان سِڪ جو ساغر ٿيان
*****
عڪس بنجي رهه اکيون پنهنجون ٿو ڪيميرا ڪريان
يا ته تون تصوير ٿي ۽ مان حسين منظر ٿيان
*****
ڇو نه آئينو ٿيان ، مون ۾ ڏسين تون ، پاڻ کي
”سيال“ مالڪ ساهه جو ٿي ، آءُ تنهنجو گھر ٿيان