جڏهن کان جيءُ ۾ جذبن ، اچي ڪي جھاتڙيون پاتيون
تڏهن کان سونهن جي سپنن، اچي ڪي جھاتڙيون پاتيون
*****
رهي ڪجھه ڏينهن نيڻن ۾ ، ويو ڪو ننڊ چورائي
ته پوءِ اکڙين ۾ اوجاڳن ، اچي ڪي جھاتڙيون پاتيون
*****
اوهان جي سا ر بي اختيار ٿي پئي ، ساهه ۾ تڏهن
اندر ۾ عشق جي اُڌمن ، اچي ڪي جھاتڙيون پاتيون
*****
ڀري محفل ، ڏسي توکي ، ٿيا جذ با ت بي قابو
لبن جي سيج تي مرڪن ، اچي ڪي جھاتڙيون پاتيون
*****
ادا ، ڪا دلبري جي آهي ، يا ديوانگي چئجي
دريءَ جي اوٽ کان سڄڻن ، اچي ڪي جھاتڙيون پاتيون
*****
جڏهن کان تنهنجي پهچڻ جي ، ڏني پڪ آ پڪي ماڻهو
تڏهن کان دل اندر ڌڙڪن ، اچي ڪي جھاتڙيون پاتيون
*****
بڻايا ڪوٽ جو ڪڪرن اچي ، ڪلهه چنڊ جي آڏو
سڄڻ جي ”سيال“ ساروڻين ، اچي ڪي جھاتڙيون پاتيون