ٻالڪ پيارا
سنڌي ٻالڪ پيارا پيارا.
علم ادب سان چاھہ رکن ٿا،
ڌرتيءَ تي ويساھہ رکن ٿا،
سندر سندر سوچن وارا،
سنڌي ٻالڪ پيارا پيارا.
مقصد تن جو آھہ محبت،
آھہ اندر ۾ سڀ لئہ الفت،
مٺڙا ماکيءَ جي ڄڻ ڌارا،
سنڌي ٻالڪ پيارا پيارا.
روزانو اسڪول وڃن ٿا،
ساڃاھہ وارا درس پڙهن ٿا،
ماڻڪ موتي جيئن موچارا،
سنڌي ٻالڪ پيارا پيارا.
اجرڪ ٽوپي تَنَ تي پائن،
گيت امن وارا ٿا ڳائن،
آهن سڀ ڪنھن ساھہ سھارا،
سنڌي ٻالڪ پيارا پيارا.
جُڳ جُڳ جيئن شال سدائين،
رهن سڀيئي خوشحال سدائين،
هردم همت، جُرئت وارا،
سنڌي ٻالڪ پيارا پيارا.