پيٽوُ
ٽَڪو بہ هڪڙو ڪينَ ڪمائي-
هي تہ صفا ڪو پيٽوُ آهي!
ڪالھہ بہ هُن کي مار مِلي آ،
سنگت ساري خوب کِلي آ،
اڄ پڻ ويٺو گنج ڪُٽائي-
هي تہ صفا ڪو پيٽوُ آهي!
جتي بہ سَڻڀو مال ڏسي ٿو،
گهڙي نہ هڪ پوءِ گهر ٽِڪي ٿو،
کاڌي ڪارڻ خلق کِلائي-
هي تہ صفا ڪو پيٽو آهي!
ڪم تہ هِن کان ڪين پُڄي ٿو،
محنت کان ڀي پري ڀڄي ٿو،
اوڌر تي پيو ڪم ٽپائي-
هي تہ صفا ڪو پيٽوُ آهي!
حلوو هِن کي جام وڻي ٿو،
چھري مان ڀي گرھہ کڻي ٿو،
جو آيو سو ڪين موٽائي-
هي تہ صفا ڪو پيٽوُ آهي!
ڪم کان آ لاچار سدائين،
چوي ٿو: ”مان بيمار“ سدائين،
گهر وارن کي پيو ستائي-
هي تہ صفا ڪو پيٽوُ آهي!
ٻارو! سُست نہ هرگز ٿيئجي،
همت ۽ جرئت سان جيئجي،
ڇڏيو ’وفا‘ آ سچ سُڻائي-
هي تہ صفا ڪو پيٽوُ آهي!