دُعا
گذريل، ايندڙ سال ٿو ڄاڻين!
هر شيءِ جو تون خالق آهين،
عرب و عجم جو مالڪ آهين.
هر شيءِ تنھنجي تابع آهي،
تُنھنجي حڪمت جامع آهي.
سج چنڊ تارا تو ئي بڻايا،
نوري نظارا تو ئي بڻايا.
جڳ سڄي جو والي تون ئي،
ڪون و مڪان جو مالھي تون ئي.
هر ڪنھن کي ٿو رزق رَسائين،
پنھنجي قدرت پاڻ پَسائين.
سائين تو ۾ سونھن سوائي،
هر لب تي وحدانيت وائي.
سائين! توکان جنھن بہ گهريو آ،
خالي هرگز سو نہ وريو آ.
’وفا‘ بہ توکي عرض ڪري ٿو،
توکان تنھنجو ڪرم گهري ٿو.